Երևանի ավագանին տեղական տուրքերի արտոնություններ սահմանեց շենքերի և շինությունների կառուցման ժամկետների երկարաձգման համար

Երևանի ավագանին որոշում ընդունեց մայրաքաղաքի տարածքում շենքերի և շինությունների կառուցապատման թուլտվությունների ժամկետների երկարաձգման համար տեղական տուրքերի դրույքաչափերի արտոնություններ տրամադրելու վերաբերյալ։

«Արմենպրես»-ի հաղորդմամբ՝ որոշման նախագիծը Երևանի ավագանու դեկտեմբերի 23-ի նիստում ներկայացրեց քաղաքապետարանի աշխատակազմի Եկամուտների հաշվառման և գանձման վարչության պետի ժամանակավոր պաշտոնակատար Դավիթ Հակոբյանը։

Որոշման համաձայն՝  ՀՀ օրենսդրությամբ սահմանված կարգով հաստատված ճարտարապետաշինարարարական նախագծին համապատասխան Երևանի վարչական տարածքում նոր շենքերի և շինությունների շինարարության թույլտվությունների ժամկետների երկարաձգման  յուրաքանչյուր տարվա համար 2026 թվականի սահմանված տեղական տուրքի դրույքաչափի նկատմամբ կկիրառվի տեղական տուրքի դրույքաչափի նվազեցման արտոնություն՝ տեղական տուրքի 70 տոկոսի չափով՝ 2025 թվականի համար սահմանված 75 տոկոսի դիմաց։

Բացի այդ՝  Երևանի վարչական տարածքում  նոր շենքերի և շինությունների շինարարության թույլտվության ժամկետների երկարաձգման յուրաքանչյուր տարվա համար 2026 թվականի համար տեղական տուրքի դրույքաչափի նկատմամբ կկիրառվի տեղական տուրքի նվազեցման արտոնություն տեղական տուրքի 85 տոկոսի չափով, եթե դիմումատուի նկատմամբ առկա չէ սահմանված քաղաքաշինական նորմատիվա-տեխնիկական նորմերի մասով կայացված վարչական տույժի մասին որոշում։

Ավագանու որոշմամբ՝ տեղական տուրքի էական արտոնություններ սահմանվեցին նաև կրոնական, պաշտամունքային շենքերի և շինությունների շինարարության ժամկետների երկարաձգման, ինչպես նաև բարձր ռիսկայնության աստիճանի դասակարգում ունեցող օբյեկտ հանդիսացող բազմաբնակարան և բազմաֆունկցիոնալ բնակելի շենքերի և համալիրների համար՝ շինարարության թույլտվություն տրամադրելու համար: