Որ վիրահատությունները կներառվեն առողջության ապահովագրության համակարգում․ նախարարը մանրամասնում է

Ազգային ժողովի հերթական նիստում առողջապահության նախարար Անահիտ Ավանեսյանը ներկայացրեց, թե առողջության համընդհանուր ապահովագրության շրջանակում ինչ վիրահատություններ կկատարվեն ու ինչ բժշկական ծառայություններ կմատուցվեն։ Նա ևս մեկ անգամ ընդգծեց, որ նոր համակարգը զգալիորեն ընդլայնում է պետական աջակցությամբ հասանելի բժշկական օգնությունը։

«Արմենպրես»-ի հաղորդմամբ՝ նախարարը նշեց, որ ապահովագրության շնորհիվ այն քաղաքացիները, որոնք նախկինում չէին կարողանում ստանալ մի շարք կենսական նշանակության բուժօգնություն, այժմ հնարավորություն կունենան օգտվել ավելի լայն փաթեթից։

«Նշեմ, որ կատարակտի անվճար վիրահատություն մինչև այժմ 65+ տարիքային խմբում հնարավոր չէր ստանալ, եթե անձը չուներ 1-ին կամ 2-րդ կարգի հաշմանդամություն։ Առողջության ապահովագրության շրջանակում, անկախ հաշմանդամության կարգ ունենալուց, ծառայությունը կդառնա անվճար։ Անվճար կլինեն սրտի ռիթմավարի տեղադրումը, առիթմիոլոգիական միջամտությունները, այդ թվում՝ աբլացիա, որը ուղղում է սրտի ռիթմը, դեղորայքային փաթեթը՝ քրոնիկ հիվանդությունների կառավարման համար․․․ Չարորակ նորագոյացությունների վիրահատությունները թեև նախկինում հասանելի էին, սակայն նախավիրահատական հետազոտությունները քաղաքացին պետք է հոգար սեփական միջոցներով։ Ապահովագրությամբ ամբողջ ախտորոշիչ և բուժական ցիկլը կդառնա լիարժեք անվճար, անվճար կկատարվի նաև կոնքազդրի և ծնկան հոդի էնդոպրոթեզավորումը, որը պետպատվերի ներկայիս փաթեթում չի ներառվում։ Ապահովագրության շրջանակում կներառվի և՛ վիրահատությունը, և՛ էնդոպրոթեզի արժեքը՝ մինչև 600 000 դրամ։ Քիմիոթերապիայի դեպքում այսօր պետությունը տրամադրում է մինչև 300 000 դրամ։ Ապահովագրության դեպքում սահմանվում է մինչև 1 200 000 դրամ»,- ասաց Ավանեսյանը։

Ավանեսյանը շեշտեց, որ նախկինում պետական պատվերը տրամադրում էր հիմնականում սահմանափակ ծառայություններ՝
վարակիչ, հոգեբուժական հիվանդությունների, ինչպես նաև որոշ համընդհանուր ծրագրերի շրջանակում։ Նոր համակարգով քաղաքացին կարող է լիարժեք հետազոտություններ անցնել, ախտորոշվել, վիրահատվել, հետվիրահատական աջակցություն ստանալ։