1 րոպեի ընթերցում
Էստոնիան 2026 թվականին Հայաստանում դեսպանություն կբացի։ «Արմենպրես»-ի փոխանցմամբ, ինչպես հայտնում է Հայաստանի արտաքին գործերի նախարարությունը, այս մասին Էստոնիայի արտգործնախարար Մարգուս Ցահքնայը հայտնել է Հայաստանի ԱԳ նախարար Արարատ Միրզոյանի հետ հեռախոսազրույցում։
Նախարար Միրզոյանն իր գոհունակությունն է արտահայտել Էստոնիայի կողմից կայացված այդ կարևոր որոշման կապակցությամբ՝ ընդգծելով, որ այն հիրավի արտահայտում է երկու երկրների միջև ձևավորված ամուր գործընկերությունն ու դրա հետագա խորացման հարցում երկուստեք արտահայտված շահագրգռվածությունը:
Զրուցակիցները քննարկել են երկկողմ, ինչպես նաև ՀՀ-ԵՄ հավակնոտ օրակարգի առաջմղմանը միտված կոնկրետ ծրագրերի կյանքի կոչման հարցեր: Մտքեր են փոխանակվել առաջիկա անելիքների շուրջ: Ի թիվս այլ ուղղությունների, անդրադարձ է կատարվել հիբրիդային սպառնալիքների դեմ պայքարում փոխգործակցության հարցերի:
Տարածաշրջանային զարգացումների համատեքստում անդրադարձ է կատարվել «ԹՐԻՓ ուղի» հաղորդակցությունների ծրագրի կյանքի կոչմամբ ընձեռնվող հնարավորություններին: