3 րոպեի ընթերցում
Հունգարիայի վարչապետ Վիկտոր Օրբանը նամակ է գրել Եվրահանձնաժողովի նախագահ Ուրսուլա ֆոն դեր Լայենին, որտեղ ամբողջությամբ մերժել է նրա առաջարկը Եվրամիության կողմից Ուկրաինային 135 միլիարդ եվրոյի լրացուցիչ ֆինանսական օգնություն տրամադրելու վերաբերյալ: Ինչպես «Արմենպրես»-ը տեղեկանում է ՏԱՍՍ-ից, Օրբանը հայտնել է, որ ուղերձն արդեն պատրաստ է և շուտով կուղարկվի Բրյուսել:
Ելույթ ունենալով Kossuth ռադիոկայանի առավոտյան ծրագրում՝ Օրբանը պարզաբանել է, որ սպասում է ԱՄՆ-ից վերադառնա ԵՄ հարցերով նախարար Յանոշ Բոկան, որի հետ ցանկանում է քննարկել ֆոն դեր Լայենի նախաձեռնությանը տրվող պատասխանը:
«Իմ նամակը բովանդակում է ոչ միայն Եվրահանձնաժողովի նախագահի առաջարկի մերժումը, այլև մեր հանդիպական առաջարկներն այդ առիթով», - ասել է վարչապետը:
Նա հիշեցրել է, որ Եվրահանձնաժողովի ծրագիրը նախատեսում է 135 միլիարդ եվրոյի հատկացում Ուկրաինային երեք հնարավոր ճանապարհով՝ Արևմուտքում սառեցված ռուսական ակտիվների, ԵՄ երկրների բյուջեներից դրամաշնորհների կամ նրանց ընդհանուր վարկի հաշվին: Օրբանն այս տարբերակներից ոչ մեկին չի աջակցում։ Մասնավորապես, նրա խոսքով, ռուսաստանյան ակտիվների բռնագրավումը «որոշակիորեն կխախտի ամբողջ համաշխարհային տնտեսական համակարգը, արժութային պահուստների կառավարման միջազգային համակարգը և դրա եվրոպական բաղադրիչը»։
Նա նաև գանգատվել է, որ Եվրահանձնաժողովը ցանկանում է նոր միջոցներ հատկացնել Ուկրաինային այն ժամանակ, երբ այնտեղ խոշոր կոռուպցիոն սկանդալ է բորբոքվել «զինվորական մաֆիայի» մասնակցությամբ, որը յուրացրել է եվրոպացիների միջոցները։ Ընդ որում, Բրյուսելը նույնիսկ չի կարող ստանալ հաշվետվություն այն միջոցների օգտագործման մասին, որոնք ավելի վաղ տրվել են Կիևին, քանի որ ԵՄ-ում դրա համար ոչ մի մեխանիզմ չկա, նշել է Օրբանը։
Ընդհանուր առմամբ, ըստ Օրբանի՝ Ուկրաինայի ֆինանսավորման Եվրահանձնաժողովի ծրագիրն ուղղված է այնտեղ հակամարտության շարունակմանը։ Դրա փոխարեն, ԵՄ-ն պետք է աջակցի խաղաղ կարգավորման ջանքերին և, Օրբանի խոսքով, «դուրս գա այն փողոցից, որը նրա քաղաքականությունը փակուղի է տարել»: