Հայաստան-Եվրամիություն գործընկերությունը զարգանում է արագ, ավելի ամուր է, քան երբևէ. Ուրսուլա ֆոն դեր Լայեն

Եվրոպական հանձնաժողովի նախագահ Ուրսուլա ֆոն դեր Լայենի գնահատմամբ՝ Հայաստանի և Եվրամիության հարաբերությունները զարգանում են արագ և ավելի ամուր են, քան երբևէ: «Արմենպրես»-ի փոխանցմամբ՝ այս մասին պաշտոնյան գրել է X-ի իր միկրոբլոգում՝ դիմելով Հայաստանի վարչապետ Նիկոլ Փաշինյանին:

«Հարգելի՛ պարոն Փաշինյան, ինչպես միշտ, ուրախ եմ Ձեզ տեսնել: Մենք Հայաստանը մոտեցնում ենք ԵՄ-ին՝ միաժամանակ աշխատելով խաղաղ և բարգավաճ Հարավային Կովկասի ստեղծման ուղղությամբ։ Մենք կառուցում ենք ճանապարհներ և կամուրջներ մեր 200 միլիոն եվրո արժողությամբ կապակցվածության փաթեթով, ինչպես նաև կամուրջներ մարդկանց միջև՝ խաղաղության ամրապնդմանն ուղղված մեր ներդրումներով:

Մեր ինքնավար առևտրային միջոցները նոր հնարավորություններ կբացեն. այժմ Հայաստանի արտահանման 80%-ը դեպի ԵՄ շուկա՝ չի հարկվում։ Մենք ակնկալում ենք, որ վաղը ԵՄ օրենսդիրների կողմից այս միջոցները վերջնական կընդունվեն՝ ռեկորդային ժամանակում»,- գրել է նա:

Ուրսուլա ֆոն դեր Լայենը նշել է,՝ Հայաստանն ու ԵՄ-ն ուժեղացնում են նաև էներգետիկ անվտանգությունը:

«Այսպիսով, Հայաստան-Եվրամիություն գործընկերությունը զարգանում է արագ, դեպի առաջ և ավելի ամուր է, քան երբևէ»,- նշել է Եվրահանձնաժողովի նախագահը:

Dear @NikolPashinyan, it is good to see you as always.

We are bringing Armenia closer to the EU, while working on a peaceful and prosperous South Caucasus.

We are building roads and bridges with our €200 million connectivity package.

And bridges between people, with our… pic.twitter.com/WJ4QOLiHI1

— Ursula von der Leyen (@vonderleyen) September 23, 2026

Սեպտեմբերի 24-ին Նյու Յորքում կայացել է Հայաստանի վարչապետ Նիկոլ Փաշինյանի հանդիպումը Եվրոպական հանձնաժողովի նախագահ Ուրսուլա ֆոն դեր Լայենի հետ: Վարչապետը կարևորել է ԵՄ-ի՝ Հայաստանի տնտեսական դիվերսիֆիկացման գործընթացին օժանդակություն ցուցաբերելու և այդ նպատակով ընդունվող որոշումների համար:

Նիկոլ Փաշինյանն ընդգծել է նաև ԵՄ աջակցությունը՝ Հայաստանում ժողովրդավարական բարեփոխումների արդյունավետ իրականացման գործում:

Ուրսուլա ֆոն դեր Լայենը նշել է, որ ԵՄ-ն շարունակելու է աջակցությունը ՀՀ կառավարության ծրագրերի առաջմղման և տարբեր ոլորտներում համագործակցությունը զարգացնելու ուղղությամբ: Զրուցակիցներն անդրադարձ են կատարել նաև տարածաշրջանային նշանակության թեմաներին: