2 րոպեի ընթերցում
Գեղարքունիքի մարզի Սևան համայնքի Ծովագյուղ բնակավայրի ԾովԵՄ երիտասարդական կենտրոնում հյուրընկալվել է Հայաստանում Էստոնիայի Հանրապետության արտակարգ և լիազոր դեսպան տիկին Մարգե Մարդիսալու-Կահարին:
Ինչպես «Արմենպրես»-ին տեղեկացրին Սևանի համայնքապետարանի աշխատակազմից, դեսպանին ընդունել են համայնքապետարանի աշխատակազմի զարգացման ծրագրերի, տուրիզմի, առևտրի, սպասարկման և գովազդի բաժնի պետ Դավիթ Թորոսյանը, «Սևանի տարածքային զարգացման և հետազոտությունների կենտրոն» ՀԿ նախագահ Սաթիկ Բադեյանը, երիտասարդական կենտրոնի շահառուները:
2025 թվականի մայիսին «Սևանի տարածքային զարգացման և հետազոտությունների կենտրոն» ՀԿ-ն Էստոնիայի դեսպանատան կողմից տրամադրված դրամաշնորհով ԾովԵՄ երիտասարդական կենտրոնում իրականացնում է «Շրջանառու ժառանգություն. սևանյան հուշանվերներ» ծրագիրը:
Ծրագրի նպատակն է հոգալ շրջակա միջավայրի պաշտպանության մասին, զարգացնել ստեղծագործական ձեռներեցությունը Սևան համայնքի երիտասարդների շրջանում:
Ծրագրի շրջանակներում կենտրոնում ստեղծվել է շրջանառու տնտեսության ուսումնական լաբորատորիա, որտեղ երիտասարդները սովորել և սովորում են պլաստիկ թափոնները վերածել 3D տպագրությամբ արժեքավոր հուշանվերների, որոնք ներկայացնում են համայնքի մշակութային ժառանգության տարբեր տարրեր:
Ծրագրի շնորհիվ համայնքի 12 երիտասարդի տրամադրվել է գործնական հմտություններ պլաստիկի վերամշակման, 3D մոդելավորման և կայուն զբոսաշրջության ոլորտներում:
Դեսպան Մարգե Մարդիսալու-Կահարին ծանոթացել է երիտասարդների աշխատանքներին, երիտասարդական կենտրոնի գործունեությանը, հետագա ծրագրերին, քննարկել հետագա համագործակցությանն առնչվող հարցեր:
Սևանի համայնքապետարանի աշխատակազմի զարգացման ծրագրերի, տուրիզմի, առևտրի, սպասարկման և գովազդի բաժնի պետ Դավիթ Թորոսյանի և դեսպան Մարգե Մարդիսալու-Կահարի քննարկումները վերաբերել են Սևան համայնքի հետ գործընկերային հարաբերությունների զարգացմանը: