2 րոպեի ընթերցում
Գեղարքունիքի մարզի տնտեսություններում կատարվել է 13 հազար 365,2 հեկտար աշնանացան ցորենի ցանք։
Ինչպես «Արմենպրես»-ին տեղեկացրին Գեղարքունիքի մարզպետի աշխատակազմի գյուղատնտեսության և շրջակա միջավայրի պահպանության վարչությունից, ներկա դրությամբ աշնանացանի ծավալները Գեղարքունիքում ավելի քան 3 հազար հեկտարով գերազանցում են նախորդ տարվա ցուցանիշը։
Կատարված ցանքերի մեծ մասը՝ 9684 հեկտարը, բաժին է ընկնում Վարդենիս համայնքի տնտեսություններին։ Գավառ համայնքում կատարվել է 1578, Սևան համայնքում՝ 665, Մարտունի համայնքում՝ 979,2, Ճամբարակ համայնքում՝ 459 հեկտար աշնանացան ցորենի ցանք։
13 հազար 365,2 հեկտար ցանքերից 8310 հեկտարը ցանվել է պետության կողմից հավաստագրված սերմերով՝ ՀՀ կառավարության կողմից իրականացվող «Բուսաբուծության աջակցության ծրագրի» շրջանակներում։
«Ծրագրին դիմած շահառուների թիվն անցնում է 1200-ը։ Իսկ աշնանացանի ծավալների ավելացումը հիմնականում կապված է «Բուսաբուծության աջակցության ծրագրի» ներդրման հետ, ինչը շահագրգռել է բազմաթիվ տնտեսությունների։ Հավելեմ, որ ծրագրին դիմելու դեպքում շահառուն կատարված 1 հեկտար ցանքի համար ստանալու է 80 հազար դրամի փոխհատուցում։ Վարդենիս համայնքի Մեծ Մասրիկ գյուղի մի տնտեսությունում էլ փորձնական կարգով 1 հեկտար աշնանացան գարի է ցանվել»,-ներկայացրին Գեղարքունիքի մարզպետի աշխատակազմի գյուղատնտեսության և շրջակա միջավայրի պահպանության վարչությունից։