ՆԱՏՕ-ում ԱՄՆ-ի մշտական ներկայացուցիչը կոչ է արել ԵՄ-ին ավելի վճռական գործողություններ ձեռնարկել Մոսկվայի դեմ
2 րոպեի ընթերցում
ՆԱՏՕ-ում ԱՄՆ-ի մշտական ներկայացուցիչ Մեթյու Ուիթաքերն այն կարծիքն է հայտնել, որ ԵՄ երկրները պետք է ավելի կոշտ դիրք գրավեն Ռուսաստանի նկատմամբ և բռնագրավեն նրա արգելափակված ակտիվները։ «Արմենպրես»-ի փոխանցմամբ՝ այս մասին նա ասել է Bloomberg-ին տված հարցազրույցում։
«Կարծում եմ, որ սա (ակտիվների բռնագրավումը) կնշանավորի նոր փուլ՝ ավելի ագրեսիվ Եվրոպա։ Ժամանակն է, որ նրանք սկսեն ավելի վճռականորեն գործել», - ասել է Ուիթաքերը։
Մշտական ներկայացուցիչը նաև այն կարծիքն է հայտնել, որ Ռուսաստանի ակտիվների բռնագրավումը «նշանակալի քայլ» կլինի առաջիկա մի քանի տարիներին Կիևին աջակցելու համար:
Ավելի վաղ ԱՄՆ նախագահ Դոնալդ Թրամփը քանիցս հայտարարել էր, որ չի մասնակցում այն հարցերի քննարկմանը, որոնք կապված են սառեցված ռուսական ակտիվների հետ:
Ավելի վաղ հաղորդվել էր, որ ԵՄ-ում քննարկում են Բրյուսելում գտնվող Euroclear ֆինանսական դեպոզիտարիայում պահվող շուրջ 170 միլիարդ եվրոյի չափով սառեցված ռուսական ակտիվների օգտագործման հնարավորությունը։ Ենթադրվում է, որ այս միջոցներից 140 միլիարդ եվրոն կուղղվի Ուկրաինային «ռազմատուգանքների վարկի» տրամադրմանը։ Սակայն Բելգիայի վարչապետ Բարտ դե Վևերը մտահոգություն է հայտնել նման պլանների առնչությամբ։