2 րոպեի ընթերցում
ԱՄՆ նախագահ Դոնալդ Թրամփը հայտարարել է, որ Վենեսուելայի ղեկավարությունը բանակցությունների հույս ունի ԱՄՆ-ի հետ:
«Հնարավոր է քննարկում ունենանք [Վենեսուելայի նախագահ Նիկոլաս] Մադուրոյի հետ: Տեսնենք՝ դա ինչի կհանգեցնի», - «Արմենպրես»-ի փոխանցմամբ, հայտարարել է Թրամփը Ֆլորիդայի նահագից Վաշինգտոն մեկնելուց առաջ լրագրողների հետ զրույցում: Ճշտող հարցին, թե ինչ կարգի քննարկումներ կարող են լինել դրանք, Սպիտակ տան ղեկավարն ուղղակի պատասխան չի տվել:
Թրամփին նաև հարցրել են, թե նրա վարչակազմը համակարգում է արդյոք ԱՄՆ Կոնգրեսի հետ Վենեսուելայի նկատմամբ հնարավոր գործողությունների հարցը: «Մենք կցանկանայինք, որ Կոնգրեսը ներգրավված լիներ: Մենք պարտավոր չենք ստանալ նրանց թույլտվությունը, բայց կարծում եմ՝ լավ կլիներ, եթե նրանք տեղյակ լինեին», - հայտարարել է Թրամփը:
Մադուրոն բազմիցս զգուշացրել է, որ իր երկիրը ենթարկվում է վերջին 100 տարվա ընթացքում ԱՄՆ ներխուժման ամենալուրջ սպառնալիքին: Վաշինգտոնը Վենեսուելայի իշխանություններին մեղադրում է թմրանյութերի մաքսանենգության դեմ ոչ բավարար ակտիվ պայքարի մեջ: ԱՄՆ ռազմածովային ուժերը Կարիբյան ծովում տեղակայել են ութ նավ, մեկ ատոմային սուզանավ, ավելի քան 16 հազար զինծառայող և սեպտեմբերից ի վեր միջազգային ջրերում ոչնչացրել են առնվազն 20 արագընթաց նավ և 76 մարդ, որոնց անհիմն մեղադրում են Վենեսուելայից թմրանյութերի մաքսանենգության մեջ։