1 րոպեի ընթերցում
Գեղարքունիքի մարզի Գավառ համայնքի Բերդկունք գյուղի նորակառույց մանկապարտեզ տանող ճանապարհի հիմնանորոգման աշխատանքներն արդեն ավարտվել են։
Ինչպես «Արմենպրես»-ին տեղեկացրին Գեղարքունիքի մարզպետի աշխատակազմի քաղաքաշինության, հողաշինության և ենթակառուցվածքների կառավարման վարչությունից, շինարարական աշխատանքները սկսվել էին հուլիսից՝ ՀՀ ՏԿԵ նախարարության պատվիրատվությամբ։ Ծրագրի պայմանագրային արժեքը կազմում է 77,5 միլիոն դրամ, որն ամբողջությամբ հատկացվել է պետբյուջեի միջոցներից։
Ծրագրով նախատեսված էր Սևան-Գավառ ավտոմայրուղուց դեպի Բերդկունքի նորակառույց մանկապարտեզ տանող ճանապարհի հիմնանորոգում՝ 750 գծամետր երկարությամբ և 5100 քմ մակերեսով, միակողմանի մայթի և ջրահեռացման համակարգի կառուցում, բազալտե եզրաքարերի տեղադրում։