1 րոպեի ընթերցում
Հայաստանում սիգի բնօգտագործման վճարներից մուտքերն այս տարի նախատեսվում է, որ կկազմեն մոտ 73 մլն դրամ:
«Արմենպրես»-ի հաղորդմամբ՝ այս մասին ասաց ՀՀ շրջակա միջավայրի նախարար Համբարձում Մաթևոսյանը «ՀՀ 2026թ պետական բյուջեի մասին» օրենքի նախագծի քննարկման ընթացքում:
Խոսելով սիգի արդյունագործական որսի չափաքանակներից՝ նախարարը նշեց, որ 2024-ին սահմանվել է 679 տոննա չափաքանակ, որից փաստացի որսվել է 652 տոննան: Պետական բյուջե է վճարվել 44 մլն դրամ բնօգտագործման վճար:
«2025-ին սահմանվել է 1123 տոննա չափաքանակ, որից ներկայումս փաստացի որսվել է 460 տոննա: 2025թ համար բնօգտագործման վճարից մուտքերը կկազմեն մոտ 73 մլն դրամ: 2025-ի ապրիլին ընդունված Հարկային օրենսգրքի փոփոխությամբ՝ 2026 թվականից կենսապաշարների, այդ թվում՝ սիգ ձկնատեսակների համար բնօգտագործման վճարները կվճարվեն ոչ թե փաստացի օգտագործված ծավալի, այլ տրամադրված չափաքանակի համար»,-ասաց Մաթևոսյանը:
Նա հիշեցրեց, որ ավելացվել են նաև բնօգտագործման վճարի դրույքաչափերը: Սիգի 1 կգ-ը սահմանվել է 300 դրամ՝ գործող 65 դրամի դիմաց: