Ադրբեջաներենի և վրացերենի ուսուցում իրականացվում է Հայաստանի երեքական դպրոցներում. ԿԳՄՍ նախարար
2 րոպեի ընթերցում
Կրթության, գիտության, մշակույթի և սպորտի նախարար Ժաննա Անդրեասյանը անդրադարձել է Հայաստանի դպրոցներում թուրքերենի, վրացերենի, պարսկերենի և ադրբեջաներենի ուսուցման հարցին՝ նշելով, որ այդ ուղղությամբ աշխատանքները շարունակում են ընդլայնել։
«Երբ կառավարության ծրագրում 2021 թվականին ամրագրվեց տարածաշրջանային լեզուների ուսուցման խրախուսման դրույթը, մենք հետազոտություն իրականացրեցինք, և շուրջ 400 դպրոց ցանկություն էր հայտնել դասավանդել որևէ տարածաշրջանային լեզու։ Նրանց մեծ մասը հետաքրքրված էր թուրքերենով, բայց հիմնական դժվարությունը մասնագետների պակասն էր»,- «Արմենպրես»-ի հաղորդմամբ՝ լրագրողների հետ ճեպազրույցում նշեց նախարարը։
Անդրեասյանի խոսքով՝ այս պահին տարածաշրջանային լեզուների ուսուցում իրականացվում է մոտ երեք տասնյակ դպրոցում, որոնց թվում ավելի ակտիվ է պարսկերենի դասավանդումը, ինչը հնարավոր է դարձել նաև Իրանի դեսպանատան աջակցությամբ։
«Վրացերեն դասավանդվում է երեք դպրոցում, ադրբեջաներենը՝ ևս երեք դպրոցում։ Սա դեռ սկիզբն է, և մենք խրախուսում ենք, որ ավելի շատ դպրոցներ սկսեն տարածաշրջանային լեզուների ուսուցում իրականացնել։ Մենք ապրում ենք այս տարածաշրջանում, և լեզուների իմացությունը նաև մեր հարևաններին ճանաչելու միջոց է»,-ընդգծեց Անդրեասյանը։