Փաշինյանը Հարավային Կովկասում տրանսպորտային ուղիների ապաշրջափակման առաջին շահառու է համարում նաև Կենտրոնական Ասիայի երկրներին
2 րոպեի ընթերցում
Հայաստանի Հանրապետության վարչապետ Նիկոլ Փաշինյանը Հարավային Կովկասում տրանսպորտային ուղիների ապաշրջափակման առաջին շահառուներից է համարում նաև Կենտրոնական Ասիայի երկրներին:
«Հայաստանը և Ղազախստանը Եվրասիական տնտեսական միության անդամ երկրներ են, Եվրասիական տնտեսական միությունն ապրանքների, ծառայությունների, աշխատուժի և կապիտալի ազատ հոսքի մասին է, բայց, երբ այսօր նայում ենք մեր փոխադարձ առևտրաշրջանառությանը, տեսնում ենք, որ այն ԵԱՏՄ տրամաբանությանը չի համապատասխանում, որովհետև էականորեն նվազ է փոխադարձ առևտուրը: Մեր միջև հաղորդակցության ուղիները երկար են և թանկ: Այս օրերին Ղազախստանից երկաթուղով հացահատիկ է գալիս Հայաստան՝ Ադրբեջանի տարածքով: Ադրբեջանի նախագահը հայտարարեց, որ վերացնում է իր տարածքով դեպի Հայաստան բեռների տարանցման բոլոր սահմանափակումները, և ես բարձր եմ գնահատում այս քայլը։ Եվ սրա առաջին շահառուն նաև Կենտրոնական Ասիայի երկրներն են»,- «Արմենպրես»-ի փոխանցմամբ՝ «Օրբելի ֆորում. կառուցելով խաղաղություն և բազմակողմանի համագործակցություն» խորագիրը կրող միջազգային համաժողովի ընթացքում ունեցած ելույթում ասաց ՀՀ վարչապետը։
Վարչապետն ընդգծեց՝ մեծ ցանկություն կա խորացնելու նաև Ուզբեկստանի հետ տնտեսական և քաղաքական հարաբերությունները, բայց այդ ճանապարհին բազմաթիվ լոգիստիկ խնդիրներ կան, որոնց լուծմանը կնպաստեն նաև այս նախագծերը:
«Ադրբեջանի նախագահի հայտարարությունից հետո մենք հայտարարեցինք, որ պատրաստ ենք հենց այսօր ապահովել Թուրքիայից դեպի Ադրբեջան և հակառակ ուղղությամբ բեռնատարների տարանցումը Մարգարայով և Խնձորեսկով: Այս պահին դրանք միակ ուղիներն են, որտեղ բոլոր ճանապարհներն ու ենթակառուցվածքները պատրաստ են»,- ասաց վարչապետը:
Հայաստանի վարչապետը վերահաստատեց՝ տարածաշրջանի ապաշրջափակումը ձեռնտու է ոչ միայն Հայաստանին և Ադրբեջանին, այլև Իրանին, Վրաստանին, Թուրքիային, Ռուսաստանին և Կենտրոնական Ասիայի երկրներին: