Հանրային ծառայությունների թվայնացումն ու որակի բարելավումը՝ ՆԳՆ առաջնահերթություն. Արփինե Սարգսյանը ներկայացրել է ոլորտի բարեփոխումները
2 րոպեի ընթերցում
Հայաստանի ներքին գործերի նախարար Արփինե Սարգսյանն Ազգային ժողովում 2026 թվականի պետական բյուջեի նախնական քննարկման ընթացքում ներկայացրել է ՆԳ նախարարության կողմից մատուցվող հանրային ծառայությունների որակի բարելավմանն ուղղված փոփոխությունները։
«Արմենպրես»-ի փոխանցմամբ՝ անդրադառնալով հաշվառման-քննական ծառայությունների մատուցման, թույլտվությունների և լիցենզավորման ոլորտում կատարված աշխատանքներին՝ նախարար Սարգսյանն ընդգծել է ներդրված հիբրիդային հերթագրման նոր համակարգի կարևորությունը, ինչը թույլ է տալիս թե՛ օնլայն, թե՛ կենդանի հերթագրման տարբերակով գրանցվել և սպասարկվել հաշվառման-քննական բաժիններում։
Թվային գործընթացի համատեքստում իրականացվել են նաև մի շարք օրենսդրական բարեփոխումներ, մասնավորապես՝ ընթացիկ տարվա սեպտեմբերի 1-ից ՀՀ տարածքում գործում են թվային վարորդական վկայականներ և հաշվառման վկայակագրեր։ Քաղաքացին այլևս պարտավոր չէ իր մոտ կրել ֆիզիկական վարորդական վկայական և հաշվառման վկայագիր, եթե երթևեկում է ՀՀ տարածքում։
Խոսելով քաղաքացիների կյանքն առավել հարմարավետ դարձնելուն միտված մյուս գործիքակազմի մասին՝ նախարարն ընդգծել է լրացուցիչ վճարի դիմաց վարորդական վկայական ստանալու տեսական կամ գործնական քննությունը արտահերթ հանձնելու նոր կարգավորումը։
Նրա խոսքով՝ այս հնարավորությունը քաղաքացիները բավականին ակտիվ են օգտագործում։
Ներքին գործերի նախարար Արփինե Սարգսյանը խոսել է նաև տրանսպորտային միջոցների առուվաճառքի օնլայն հարթակի մասին՝ նշելով, որ արդեն իսկ 300-ից ավելի տրանսպորտային միջոցների առուվաճառքի ողջ գործընթացն իրականացվել է օնլայն հարթակի միջոցով։