2 րոպեի ընթերցում
Ստամբուլում կայացած բանակցություններից հետո Պակիստանը և Աֆղանստանը համաձայնել են վերսկսել հաշտության բանակցությունները և պահպանել հրադադարի ռեժիմը: «Արմենպրես»-ի փոխանցմամբ՝ այս մասին հաղորդում է «Ինտերֆաքս» գործակալությունը՝ վկայակոչելով Թուրքիայի արտաքին գործերի նախարարությունը։
«Բոլոր կողմերը համաձայնել են գործի դնել մոնիթորինգի և ստուգման մեխանիզմը, որը կապահովի խաղաղության պահպանումը և խախտող կողմի նկատմամբ պատժի կիրառումը», - ասվում է Թուրքիայի ԱԳՆ հայտարարության մեջ։
Կողմերը պլանավորում են Ստամբուլում կրկին հանդիպել նոյեմբերի 6-ին՝ հրադադարի ռեժիմի պահպանման կարգը վերջնականորեն համաձայնեցնելու համար։
Հոկտեմբերի 25-ին Աֆղանստանի և Պակիստանի իշխանությունների ներկայացուցիչները հանդիպում են անցկացրել Ստամբուլում, որտեղ քննարկել են սահմանային ճգնաժամի կարգավորման ուղիները և հրադադար ռեժիմի պահպանման համար պայմանների ստեղծումը, որը հոկտեմբերի 19-ին ձեռք է բերվել Դոհայում։
Հոկտեմբերի սկզբին Աֆղանստանի իշխանությունները հայտնել են, որ գրոհել են մի քանի պակիստանյան ռազմական դիրքերի վրա և 58 պակիստանցի զինվորի սպանել՝ ի պատասխան աֆղանական տարածքի և օդային տարածության բազմակի խախտումների։ Պակիստանի զինվորականները հայտնել են քիչ կորուստների մասին՝ նշելով, որ սահմանի երկայնքով պատասխան կրակի հետևանքով կորցրել են 23 զինվորի և սպանել ավելի քան 200 «թալիբի և նրանց հետ կապված ահաբեկիչների»։
Պակիստանն ավելի վաղ հարվածներ էր հասցրել Աֆղանստանի տարածքին՝ հայտարարելով, որ թիրախավորում է արմատական իսլամիստական «Թեհրիկ-է-Թալիբան Պակիստան» խմբավորման բազաները և «Բելուջիստանի ազատագրական բանակի» բազաները: Իսլամաբադը հայտարարել է, որ Աֆղանստանն ապաստան է տրամադրում ահաբեկիչներին, որոնք հարձակումներ են գործում Պակիստանի վրա։ Քաբուլը հերքում է այս մեղադրանքները՝ հայտարարելով, որ թույլ չի տալիս իր տարածքն օգտագործել այլ երկրների դեմ: