ՀՀ ԱՆ-ն և ԱՀԿ Եվրոպական տարածաշրջանային գրասենյակը ստորագրել են 2026-2030թթ. համագործակցության հնգամյա ռազմավարությունը
1 րոպեի ընթերցում
ՀՀ Առողջապահության նախարարությունը և ԱՀԿ Եվրոպական տարածաշրջանային գրասենյակը ստորագրել են 2026–2030 թվականների համագործակցության հնգամյա ռազմավարությունը:
«Արմենպրես»-ի փոխանցմամբ՝ այս մասին հայտնում են ՀՀ առողջապահության նախարարությունից:
Նախարարությունից նշում են, որ ռազմավարությունը համահունչ է Հայաստանի ազգային առողջապահական առաջնահերթություններին, այն է՝ ամրապնդել առաջնային առողջապահությունը՝ ապահովագրական համակարգ ներդնելով, ապահովել առողջապահական ծառայությունների հավասար հասանելիությունը բոլորի համար, խթանել ժողովրդագրական կայունությանը, ամրապնդել առողջապահական անվտանգությունը և արտակարգ իրավիճակների պատրաստվածությունը:
Նախարար Անահիտ Ավանեսյանը ԱՀԿ եվրոպական տարածաշրջանի գրասենյակի ղեկավար Հանս Կլյուգեի հետ քննարկել է առողջապահական ընթացիկ ծրագրերը, մասնավորապես առողջության ապահովագրության ներդրմանն ուղղված քայլերը:
Անահիտ Ավանեսյանը երկօրյա այցով Կոպենհագենում է` մասնակցելու Առողջապահության համաշխարհային կազմակերպության եվրոպական տարածաշրջանային կոմիտեի 75-րդ նստաշրջանին: