Ճապոնիայի նոր ԱԳ նախարարն իր առաջին մամուլի ասուլիսում անդրադարձել է ՌԴ-ի, Չինաստանի և ԿԺԴՀ-ի կապերին
1 րոպեի ընթերցում
Ճապոնիայի արտաքին գործերի նախարարության նոր ղեկավար Տոսիմիցու Մոտեգին, որն արդեն այդ պաշտոնն զբաղեցրել է 2019-ից մինչև 2021 թվականը, նշանակումից հետո իր առաջին մամուլի ասուլիսում անդրադարձել է Ռուսաստանի և Չինաստանի հետ Հյուսիսային Կորեայի համագործակցության թեմային։ Այդ մասին «Արմենպրես»-ը տեղեկանում է ՏԱՍՍ գործակալությունից:
«Ռուսաստանի և Չինաստանի հետ Հյուսիսային Կորեայի համագործակցության ամրապնդումն անհանգստության տեղիք է տալիս», - նշել է նա՝ ընդգծելով, որ Ճապոնիայի շուրջ տարածաշրջանում և ամբողջ աշխարհում անվտանգության իրավիճակը զգալիորեն վատթարացել է այն ժամանակից հետո, երբ ինքը զբաղեցնում էր Ճապոնայի արտգործնախարարի պաշտոնը։
Մոտեգին քննադատել է Ռուսաստանի գործողություններն Ուկրաինայում, անհանգստություն է հայտնել Մերձավոր Արևելքում ստեղծված իրավիճակի կապակցությամբ, ինչպես նաև դատապարտել է ԿԺԴՀ-ի հրթիռային և միջուկային ծրագրի զարգացումը։
Ճապոնիայի նոր արտգործնախարարը վստահություն է հայտնել, որ միջազգային հանրությունը մեծ սպասումներ ունի Ճապոնիայի դիվանագիտական աշխատանքի առնչությամբ՝ խոստանալով ակտիվացնել աշխատանքն այդ ուղղությամբ: