ՀՀ ԱԺ պատվիրակությունը Լյուբլյանայում մասնակցում է ՆԱՏՕ-ի խորհրդարանական վեհաժողովի աշնանային նստաշրջանի աշխատանքներին
2 րոպեի ընթերցում
ՆԱՏՕ-ի խորհրդարանական վեհաժողովում Հայաստանի Ազգային ժողովի պատվիրակությունը Պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանի ղեկավարությամբ 2025 թ. հոկտեմբերի 10-13-ը Սլովենիայի Լյուբլյանա քաղաքում մասնակցում է ՆԱՏՕ-ի ԽՎ աշնանային նստաշրջանի աշխատանքներին:
«Արմենպրես»-ի փոխանցմամբ՝ այս մասին հաղորդագրություն է տարածել ՀՀ Ազգային ժողովը։
«Այս քառօրյա աշխատանքները նվիրված կլինեն ՆԱՏՕ-ի ամրապնդմանը՝ Հաագայի հունիսյան գագաթնաժողովում Հյուսիսատլանտյան դաշինքի առաջնորդների կողմից ընդունված որոշումների համաձայն, ներառյալ համախառն ներքին արդյունքի 5% - ը պաշտպանության և անվտանգության հետ կապված ներդրումների վրա ծախսելու պարտավորությունը մինչև 2035 թվականը», - ընդգծել Է ՆԱՏՕ-ի Խորհրդարանական վեհաժողովի նախագահ Մարկոս Պերեստրելլոն իր բացման խոսքում:
Անդրանիկ Քոչարյանը, հայկական պատվիրակության անդամներ Վահագն Ալեքսանյանը և Արուսյակ Ջուլհակյանը կմասնակցեն Ժողովրդավարության և անվտանգության հարցերի, Պաշտպանության և անվտանգության հարցերի, Տնտեսական և անվտանգության հարցերի, Քաղաքական հարցերի, Գիտության և տեխնոլոգիաների հարցերի հանձնաժողովների, ինչպես նաև՝ լիագումար նիստի աշխատանքներին:
Հայկական պատվիրակության հետ ՆԱՏՕ ԽՎ քառօրյա աշխատանքներին է մասնակցում նաև Հյուսիս-Ատլանտյան պայմանագրի կազմակերպությունում Հայաստանի Հանրապետության առաքելության ղեկավար Արման Իսրայելյանը: