Համբարձում Մաթևոսյանն Աստրիդ Շոմեյքերի հետ քննարկել է Հայաստանում կայանալիք COP17-ի նախապատրաստական աշխատանքների ընթացքը
2 րոպեի ընթերցում
Հայաստանի շրջակա միջավայրի նախարար Համբարձում Մաթևոսյանը ՄԱԿ-ի Կենսաբանական բազմազանության մասին կոնվենցիայի գործադիր քարտուղար Աստրիդ Շոմեյքերի հետ քննարկել է 2026 թվականին Հայաստանում կայանալիք Կենսաբազմազանության մասին կոնվենցիայի կողմերի 17-րդ համաժողովի (COP17) նախապատրաստական աշխատանքների ընթացքը:
«Արմենպրես»-ի փոխանցմամբ՝ այս մասին «Ֆեյսբուք»-ի իր էջում հայտնել է Համբարձում Մաթևոսյանը:
«Բնության պահպանության միջազգային միության (IUCN) Բնապահպանության համաշխարհային կոնգրեսին մեր մասնակցության շրջանակում հնարավորություն ունեցանք կրկին հանդիպել ՄԱԿ-ի Կենսաբանական բազմազանության մասին կոնվենցիայի գործադիր քարտուղար տիկին Աստրիդ Շոմեյքերի հետ։
Քննարկեցինք 2026 թվականին Հայաստանում կայանալիք Կենսաբազմազանության մասին կոնվենցիայի կողմերի 17-րդ համաժողովի (COP17) նախապատրաստական աշխատանքների ընթացքը»,- նշել է Մաթևոսյանը:
Կողմերը կարևորել են միջազգային գործընկերների հետ սերտ համագործակցության և համատեղ ջանքերի ուժեղացումը՝ համաժողովի բարձր մակարդակով կազմակերպման և արդյունավետ անցկացման նպատակով։
Նախարարը հայտնել է, որ առաջիկայում նախատեսվում է Շոմեյքերի այցը Հայաստան, որի ընթացքում կկայանան հանդիպումներ պետական կառույցների, միջազգային կազմակերպությունների և քաղաքացիական հասարակության ներկայացուցիչների հետ՝ COP17-ի նախապատրաստական աշխատանքների համակարգման և համագործակցության խորացման ուղղությամբ։