Ներքին Գետաշենում ընթանում են ոռոգման ներքին ցանցի կառուցման աշխատանքներ

Գեղարքունիքի մարզի Մարտունի համայնքի Ներքին Գետաշեն գյուղում ՀՀ կառավարության կողմից 2025 թվականին իրականացվող սուբվենցիոն ծրագրերի շրջանակներում սեպտեմբերի սկզբից ընթանում են ոռոգման ներքին ցանցի կառուցման աշխատանքները։ 

Ինչպես «Արմենպրես»-ին տեղեկացրեց Ներքին Գետաշեն գյուղի վարչական ղեկավար Ռուբեն Զուլոյանը, գյուղի ոռոգման համակարգի կառուցման ծրագրի պայմանագրային արժեքը կազմում է 175 միլիոն 329 հազար դրամ, որի 75 տոկոսը հատկացնում է ՀՀ կառավարությունը, 25 տոկոսը՝ Մարտունու համայնքապետարանը։

Ծրագրով նախատեսված է ոռոգման ներքին ցանցի կառուցում Ներքին Գետաշենի 20 տարբեր փողոցներում, երկաթբետոնյա և երկաթյա կիսախողովակներով, շուրջ 5 հազար մետր երկարությամբ։

Ծրագրի շահառու է հանդիսանում շուրջ 1500 տնտեսություն։

Ծրագրի իրականացման արդյունքում եկող տարվանից տնամերձ հողամասերում ոռոգման ջուրը տնտեսություններին կմատակարարվի ժամանակին և անկորուստ։ 

2025 թվականի հոկտեմբերի 5-ի դրությամբ շինարարական աշխատանքներն իրականացվել են շուրջ 30 տոկոսով։