Հունաստանում Հայաստանի դեսպանն այցելել է Աթենքի Բյուզանդական և քրիստոնեական թանգարանի մաս հանդիսացող Լովերդոսի թանգարան
2 րոպեի ընթերցում
Հունաստանում Հայաստանի Հանրապետության արտակարգ և լիազոր դեսպան Տիգրան Մկրտչյանն այցելել է Աթենքի Բյուզանդական և քրիստոնեական թանգարանի մաս հանդիսացող Լովերդոսի թանգարան։
Ինչպես «Արմենպրես»-ը տեղեկանում է դեսպանության տարածած հաղորդագրությունից, Տիգրան Մկրտչյանը թանգարանի գլխավոր տնօրեն Եկատերինա Դելապորտայի հետ շրջայց է կատարել Լովերդոսի թանգարանում, ծանոթացել այստեղ ներկայացվող բացառիկ ցուցանմուշներին։
Առանձնազրույցի ընթացքում քննարկվել են առաջիկայում դեսպանության հետ համագործակցաբար միջոցառումներ անցկացնելու հնարավորությունները։
Միաժամանակ քննարկման առարկա է եղել Հայաստանի հետ միջթանգարանային համագործակցության հաստատումն ու զարգացումը։ Տիգրան Մկրտչյանը մատնանշել է այդ ուղղությամբ Հունաստանի հետ վերջերս ձեռք բերված պայմանավորվածությունները, որոնք կայացել են ՀՀ կրթության, գիտության, մշակույթի և սպորտի նախարար Ժաննա Անդրեասյանի Աթենք կատարած պաշտոնական այցի ընթացքում։
Տիկին Դելապորտան ջերմությամբ վերհիշել է նախկինում երկու անգամ իրենց թանգարանում հայկական մշակութային թեմաներով կազմակերպված խոշոր ցուցահանդեսները, որոնք անցել են մեծ հաջողությամբ։
Այցելության ավարտին Տիգրան Մկրտչյանը հյուրերի համար նախատեսված հուշամատյանում կիսվել է իր տպավորություններով։