Ռուբեն Ռուբինյանն ու Գեղամ Նազարյանն առաջարկում են հունվարի 27-ը սահմանել որպես «Հիշատակի և խոնարհումի օր»
1 րոպեի ընթերցում
Հայաստանի Ազգային ժողովի փոխնախագահ Ռուբեն Ռուբինյանն ու անկախ պատգամավոր Գեղամ Նազարյանը օրենքի նախագիծ են մշակել, որով առաջարկում են հունվարի 27-ը սահմանել որպես «Հիշատակի և խոնարհումի օր»՝ հարգանքի տուրք մատուցելով բոլոր ժամանակների ռազմական գործողությունների ընթացքում զոհվածների հիշատակին։
«Արմենպրես»-ի փոխանցմամբ՝ այս մասին «Ֆեյսբուք»-ի իր էջում գրել է ՀՀ ԱԺ փոխնախագահ Ռուբեն Ռուբինյանը։
«Սիրելի բարեկամներ, տեղեկացնեմ, որ մոտ օրերս ես և ԱԺ պատգամավոր Գեղամ Նազարյանը կշրջանառենք նախագիծ, որով հունվարի 27-ը կսահմանվի որպես «Հիշատակի և խոնարհումի օր»:
Մեզ պետք է ունենալ հատուկ օր, երբ կհարգենք բոլոր ժամանակների ռազմական գործողությունների ընթացքում զոհվածների հիշատակը և կխոնարհվենք հայրենիքի համար բոլոր ընկածների առաջ:
Ըստ նախագծի` այդ օրը կլինի հունվարի 27-ը, իսկ հունվարի 28-ին արդեն, ինչպես միշտ, կնշենք և կտոնենք Բանակի օրը` որպես շարունակվող կյանքի ու կամքի խորհրդանիշ»,- գրել է Ռուբինյանը: