368.54
ՃՇՀԱՀ-ը, Միլանի պոլիտեխնիկ ինստիտուտը և ԳՊՀ-ն համատեղ կուսումնասիրեն Գավառի պատմաճարտարապետական կառույցները
2 րոպեի ընթերցում
Գավառի համայնքապետարանում հյուրընկալվել են Ճարտարապետության և շինարարության Հայաստանի ազգային համալսարանի, Միլանի պոլիտեխնիկ ինստիտուտի դասախոսները և ուսանողները։
Ճարտարապետության և շինարարության Հայաստանի ազգային համալսարանի դասախոսական կազմը և ուսանողները, Իտալիայի Հանրապետության Միլանի պոլիտեխնիկի դասախոսները և Գավառի պետական համալսարանի ուսանողները Գավառ քաղաքում իրականացնելու են պատմաճարտարապետական հետաքրքրություն ներկայացնող շինությունների ու տարածքների եռօրյա համատեղ ուսումնասիրություններ։
Ինչպես «Արմենպրես»-ին տեղեկացրին Գավառի համայնքապետարանի աշխատակազմից, ուսումնասիրության արդյունքում կազմվելու և համայնքին ու հանրությանն է ներկայացվելու Գավառի պատմաճարտարապետական շինությունների ցանկը, դրանց պահպանման եղանակները։
Ճարտարապետության և շինարարության Հայաստանի ազգային համալսարանի և Միլանի պոլիտեխնիկ ինստիտուտի միջև համագործակցությունը սկսվել է դեռևս 2012 թվականից՝ «Էրազմուս պլյուս» շարժունակության ծրագրով, որի շրջանակներում էլ իրականացվում են այս աշխատանքները։
Աշխատանքային խմբին ընդունել է Գավառ համայնքի ղեկավարի առաջին տեղակալ Գրիգոր Դաշտոյանը։ Աշխատանքների պատասխանատու, ՃՇՀԱՀ-ի Ճարտարապետության տեսության պատմության և ժառանգության ամբիոնի վարիչ Էմմա Հարությունյանը ներկայացրել է այցի նպատակը և Գավառում իրականացվելիք աշխատանքները։
Երկու օրերի ընթացքում երիտասարդ դասախոսների մեթոդական օգնությամբ ուսանողները կիրականացնեն հետազոտական դաշտային աշխատանքներ և արդյունքները կներկայացնեն ՃՇՀԱՀ-ում։ Դրանք կներգրավվեն ընդհանուր ծրագրի մեջ։
Բաժանորդագրվեք մեր ալիքին Telegram-ում