2 րոպեի ընթերցում
Հայաստանի գրեթե ողջ տարածքում սեպտեմբերի 18-ից երեկոյան ժամերից սպասվում է անձրև, ամպրոպ և ջերմաստիճանի անկում՝ մոտ 8-12 աստիճանով։
«Արմենպրես»-ի փոխանցմամբ՝ այս մասին հայտնել է ՀՀ շրջակա միջավայրի նախարարության հիդրոօդերևութաբանության և մոնիթորինգի կենտրոնի տնօրենի տեղակալ Գագիկ Սուրենյանը՝ նշելով, որ առանձին հատվածներում տեղումները կլինեն հորդառատ, հնարավոր է նաև կարկուտ։ Ամպրոպների ժամանակ քամու ուժգնությունը կարող է հասնել վայրկյանում 18-22 մետրի։
«Սև ծովի շրջանից Հայաստան է շարժվում ակտիվ ցիկլոն, որի ներթափանցումը կմեկնարկի սեպտեմբերի 18-ի ուշ երեկոյան։ Այն կհանգեցնի հորդառատ տեղումների, ամպրոպների, կարկուտի, օդի ջերմաստիճանի զգալի նվազման։
Ցիկլոնը հյուսիս-արևմուտքից բերում է արկտիկական ցուրտ օդային հոսանքներ։ Այդ պատճառով սեպտեմբերի 19-ի ցերեկային ժամերին օդի ջերմաստիճանը երկրի ողջ տարածքում այսօրվա համեմատ կնվազի 8-12 աստիճանով։ Սեպտեմբերի 20-ին, սակայն, ջերմաստիճանը կբարձրանա 4-5 աստիճանով»,- ասել է Սուրենյանը:
Նա ընդգծել է ՝սեպտեմբերի 20-21-ին ցիկլոնն աստիճանաբար կկորցնի իր ուժը։ Տեղումները կպահպանվեն միայն առանձին հատվածներում և կլինեն կարճատև։ Սեպտեմբերի 22-ից հետո տեղումները կդադարեն ամբողջ հանրապետությունում։