2 րոպեի ընթերցում
ՄԱԿ-ի գլխավոր քարտուղար Անտոնիո Գուտերեշն անհրաժեշտություն է համարել Անվտանգության խորհրդի բարեփոխումը, քանի որ ներկայիս կազմն արտացոլում է 1945 թվականի, ոչ թե ժամանակակից աշխարհի իրողությունները, ինչը խնդիրներ է ստեղծում լեգիտիմության և արդյունավետության հարցում։
«Արմենպրես»-ի հաղորդմամբ՝ ինչպես փոխանցում է ՏԱՍՍ-ը, Անտոնիո Գուտերեշը նման համոզմունք է հայտնել լրագրողների հետ զրույցում՝ մեկնաբանելով կազմակերպության բարեփոխման անհրաժեշտության հարցը։
«Անվտանգության խորհրդի բարեփոխումը լիովին իմաստ ունի։ Անվտանգության խորհուրդն ունի կազմ, որը չի համապատասխանում ժամանակակից աշխարհին։ Այն համապատասխանում է 1945 թվականի աշխարհին և սա ստեղծում է ոչ միայն լեգիտիմության, այլև արդյունավետության խնդիր», - ասել է Գուտերեշը։
ՄԱԿ-ի գլխավոր քարտուղարը նշել է, որ համակրանքով է մոտենում, մասնավորապես՝ Ֆրանսիայի և Մեծ Բրիտանիայի առաջարկներին՝ վետոյի իրավունքը սահմանափակելու վերաբերյալ, հատկապես՝ մարդու իրավունքների զանգվածային խախտումների դեպքերում։
Նա ընդգծել է, որ ինքը առաջին գլխավոր քարտուղարն է, ով անընդհատ խոսում է Անվտանգության խորհրդի բարեփոխման անհրաժեշտության մասին։
Գուտերեշը նշել է, որ բարեփոխումների հարցում առաջընթաց է գրանցվել։
«Այժմ կա մի հանձնաժողով, որը լրջորեն աշխատում է, և մի քանի երկրներ, նույնիսկ մշտական հնգյակից, ընդունել են, որ Աֆրիկան պետք է ունենա մշտական անդամակցության իրավունք»,-հայտնել է նա՝ հիշեցնելով, որ բարեփոխումների և վետոյի իրավունքի վերաբերյալ վերջնական որոշումը կարող են կայացնել միայն անդամ պետությունները։