Ամերիկացի ակտիվիստ Չարլի Քըրքի մահվան առնչությամբ ԱՄՆ-ի ողջ տարածքում կխոնարհվեն դրոշները
1 րոպեի ընթերցում
Միացյալ Նագանգների նախագահ Դոնալդ Թրամփը կարգադրել է ամերիկացի ակտիվիստ Չարլի Քըրքի սպանության առնչությամբ ամբողջ երկրի տարածքում խոնարհել ԱՄՆ դրոշները։
Քըրքը մահացել էր սեպտեմբերի 10-ին ԱՄՆ Յուտայի նահանգի Յուտա Վելի համալսարանում կազմակերպված քննարկման ժամանակ արձակված կրակոցի հետևանքով։
«Սքանչելի և նույնիսկ լեգենդար Չարլի Քըրքը մահացել է։ Ոչ ոք Ամերիկայի Միացյալ Նահանգների երիտասարդությանն ավելի լավ չէր հասկանում և նրա ապրումներին հաղորդակից չէր այնպես, ինչպես Չարլին։ Նրան սիրում և հիանում էին բոլորը, հատկապես ես, և հիմա նա այլևս մեզ հետ չէ», - «Արմենպրես»-ի փոխանցմամբ, գրել է Թրամփը Truth Social հարթակում։
Սպանության մեջ կասկածվողի որոնումները շարունակվում են։
Ականատեսները սոցիալական ցանցերում հրապարակել էին սպանության տեսանյութերը, որոնցում լսվում է կրակոցը, ինչից հետո ակտիվիստի պարանոցից սկսում է արյուն հոսել։
Չարլի Քըրքը Թրամփի կողմնակիցներից էր, նա ակտիվորեն աջակցել է նրան անցյալ տարվա նախագահական ընտրությունների ժամանակ: