3 րոպեի ընթերցում
Փրկարարի օրվա շրջանակում Ազատության հրապարակում ՀՀ ներքին գործերի նախարարության փրկարար ծառայությունն անցկացրեց ցուցադրական հատուկ տակտիկական ուսումնավարժություն։
«Արմենպրես»-ի հաղորդմամբ՝ ուսումնավարժությանը ներգրավված էին մի քանի տասնյակ փրկարար ծառայողներ, որոնք ներկայացրեցին տարբեր արտակարգ իրավիճակներում գործելու մարտավարությունը։ Բացի վարժանքից, այցելուներին ցուցադրվեցին նաև փրկարարական հատուկ տեխնիկան և մեքենաները։
Միջոցառմանը ներկա էին Ներքին գործերի նախարար Արփինե Սարգսյանը, ՆԳ նախարարի տեղակալ, փրկարար ծառայության տնօրեն Կամո Ցուցուլյանը, Երևանի քաղաքապետ Տիգրան Ավինյանը և այլ պաշտոնյաներ։
Արփինե Սարգսյանը շնորհավորեց փրկարար ծառայողներին մասնագիտական օրվա կապակցությամբ՝ ընդգծելով նրանց աշխատանքի առանձնահատուկ կարևորությունը․
«Ձեր ծառայությունը բացառիկ է իր բովանդակությամբ․ դուք յուրաքանչյուր օր անձնուրաց կերպով, առանց տրտնջալու պաշտպանում եք Հայաստանի Հանրապետության յուրաքանչյուր բնակչի անվտանգությունը։ Վերջին շրջանում մենք բազմաթիվ փորձությունների ենք բախվել, սակայն դուք ապացուցեցիք, որ յուրաքանչյուր դժվարություն ավելի է ամրապնդում ձեր մասնագիտական պատրաստվածությունը։ Ձեր ծառայության հիմքում մեծ դեր ունեն նաև ձեր ընտանիքները, որոնք կիսում են ձեր ծանրաբեռնվածությունն ու զոհողությունները։ Պետությունը գնահատում է ձեր աշխատանքը, և առաջիկայում սպասվում են էական ու դրական փոփոխություններ փրկարար ծառայության աշխատանքում»,- ընդգծեց Սարգսյանը։
Նախարարը նշեց նաև, որ նման վարժանքների անցկացումն անհրաժեշտ է ոչ միայն ծառայողների մասնագիտական պատրաստվածությունը բարձրացնելու, այլև քաղաքային միջավայրում իրական արտակարգ իրավիճակներին առավել արդյունավետ արձագանքելու համար։
Երևանի քաղաքապետ Տիգրան Ավինյանը նույնպես շնորհավորեց փրկարարներին՝ շնորհակալություն հայտնելով նրանց իրենց կատարած բարդ և պատասխանատու աշխատանքի համար։
«Դուք այնտեղ եք, որտեղ կա վտանգ և արտակարգ իրավիճակ։ Դուք ոչ միայն փրկում եք կյանքեր, այլև ապահովում եք քաղաքի բնականոն ընթացքը։ Երևանցիների անունից մաղթում եմ ձեզ առողջություն, ուժ և նոր հաջողություններ»,-եզրափակեց Ավինյանը։
Քաղաքապետը նաև հատուկ պարգևատրեց մի խումբ փրկարարների՝ նրանց ցուցաբերած անձնվեր ծառայության և Երևանի անվտանգության ապահովման գործում ունեցած ներդրման համար։