1 րոպեի ընթերցում
Կառավարության նիստում Ներքին գործերի նախարար Արփինե Սարգսյանը ներկայացրեց վարորդական վկայականների քննությունների կարգում կատարված փոփոխությունները։
«Արմենպրես»-ի հաղորդմամբ՝ նախարարը նշեց, որ ներկայում գործող կանոնով անձը, որը տեսական քննությունն անցնում է, օրինակ, Երևանի հաշվառման քննական ստորաբաժանումում, պարտավոր է գործնական քննությունը ևս հանձնել նույն տարածքային ստորաբաժանումում։
«Մեր քաղաքացիների արդարացի պնդումներով այս մոտեցումը շատ հաճախ չի ապահովում ճկունություն և խոչընդոտում է օր առաջ ունենալ նաև գործնական քննություն։ Ըստ այդմ, այս կանոնը դուրս է բերվում։ Քաղաքացիները կարող են ազատորեն մուտք գործել հարթակ, տեսնել, թե որ օրն է հասանելի, և եթե պայմանականորեն տեսական քննությունը հանձնել են Երևանում, իսկ մոտակա օր հասանելի է Շիրակի մարզում, ապա կարող են գրանցվել և հանձնել գործնական քննությունը տվյալ մարզում»,-ասաց նա։
Սարգսյանի գնահատմամբ՝ այս փոփոխությունը կնպաստի նաև քննական ստորաբաժանումների ծանրաբեռնվածության բալանսավորմանը և հերթերի կրճատմանը։