Թրամփ-Պուտին հանդիպումը տեղի կունենա Անքորիջի Էլմենդորֆ-Ռիչարդսոն ռազմաբազայում. CNN
1 րոպեի ընթերցում
ԱՄՆ նախագահ Դոնալդ Թրամփի և Ռուսաստանի նախագահ Վլադիմիր Պուտինի հանդիպումը, որը պլանավորված է Ալյասկայում, տեղի կունենա Էլմենդորֆ-Ռիչարդսոն ռազմաբազայում: «Արմենպրես»-ի փոխանցմամբ՝ այս մասին հաղորդում է CNN-ը՝ հղում անելով տեղեկացված աղբյուրների։
Ըստ հրապարակման՝ կազմակերպիչները եկել են այն եզրակացության, որ հսկայական նահանգի միակ քաղաքը, որը կարող է հարմար վայր դառնալ գագաթնաժողովի անցկացման համար, լինելու է Անքորիջը։ Եվ միայն քաղաքի հյուսիսային ծայրամասում գտնվող Էլմենդորֆ-Ռիչարդսոն միավորված բազան է համապատասխանել պատմական հանդիպման անցկացման պահանջներին։
Հեռուստաալիքի զրուցակիցները հավելել են, որ Սպիտակ տունը հույս ուներ խուսափել Ռուսաստանի ղեկավարին և նրա պատվիրակությանն ամերիկյան ռազմական օբյեկտում հյուրընկալելու իրավիճակից։
Սակայն Ալյասկայում այժմ զբոսաշրջային ամենաեռուն շրջանն է, ուստի գագաթնաժողովի համար այլ հարմար վայրեր չի հաջողվել գտնել։
Թրամփի և Պուտինի հանդիպումը Ալյասկայում կանցկացվի ուրբաթ օրը՝ օգոստոսի 15-ին։