1 րոպեի ընթերցում
Հայաստանը, Ղազախստանը և Ռուսաստանը ներկայացնող երաժիշտները ելույթ կունենան UralTerraJazz ջազի միջազգային փառատոնում, որը կկայանա օգոստոսի 9-ին Սվերդլովսկի մարզի Կամիշլով քաղաքում:
«Արմենպրես»-ի փոխանցմամբ՝ այդ մասին ՏԱՍՍ-ի Ուրալի տարածաշրջանային կենտրոնում կայացած մամուլի ասուլիսում հայտնել է Ռուսաստանի ժողովրդական արտիստ, դաշնակահար, կոմպոզիտոր և պրոդյուսեր Դանիիլ Կրամերը:
Փառատոնի ծրագրերի տնօրեն Իրինա Շչետնիկովան հայտնել է, որ Ուրալի բնակիչների և հյուրերի համար ելույթ կունենա նաև Արտեմ Մանուկյանը Հայաստանից։
«Նա իսկապես աշխարհի մեծագույն աստղերից մեկն է, թավջութակահար, որը ելույթ է ունեցել ջազի համաշխարհային աստղերի մեծ մասի հետ, մասնակցել է բազմաթիվ մեծ երաժիշտների ալբոմների ստուդիական ձայնագրություններին։ Դա մարդ է, որը բազմաթիվ սաունդթրեքներ է գրում, մասնավորապես, նրա երաժշտությունը կարելի է լսել «Կանաչ գիրքը» ֆիլմում», - ասել է Շչետնիկովան:
Այս տարի փառատոնը նվիրված կլինի Հայրենական մեծ պատերազմում տարած հաղթանակի 80-ամյա հոբելյանին: