Կանադան սեպտեմբերին կճանաչի Պաղեստինը. Մարկ Քարնի

Կանադայի վարչապետ Մարկ Քարնին հայտարարել է ՄԱԿ-ի Գլխավոր ասամբլեայի սեպտեմբերյան նստաշրջանում Պաղեստինի պետությունը ճանաչելու մտադրության մասին։ «Արմենպրես»-ի փոխանցմամբ, այս մասին հայտնում է Associated Press լրատվական գործակալությունը։

«Կանադան մտադիր է ճանաչել Պաղեստինի պետությունը ՄԱԿ-ի Գլխավոր ասամբլեայի 80-րդ նստաշրջանում՝ 2025 թվականի սեպտեմբերին», - ասել է Քարնին հրավիրված նախարարական հանդիպման ընթացքում։

Նշվում է, որ Պաղեստինի ճանաչումը թելադրված է Պաղեստինի ազգային ինքնավարության կողմից անհրաժեշտ բարեփոխումների իրականացման հանձնառությամբ, այդ թվում՝ Պաղեստինի առաջնորդ Մահմուդ Աբբասի՝ «կառավարման համակարգը հիմնարար կերպով բարեփոխելու, 2026 թվականին ընդհանուր ընտրություններ անցկացնելու, որոնց ՀԱՄԱՍ-ը չի կարողանա մասնակցել, և Պաղեստինի պետությունը ապառազմականացնելու պարտավորությամբ»։

Բացի այդ, Քարնին կրկին կոչ է արել ՀԱՄԱՍ-ին ազատ արձակել 2023 թվականի հոկտեմբերի 7-ի հարձակման հետևանքով վերցված պատանդներին, ինչպես նաև ընդգծել է, որ շարժումը «չպետք է որևէ դեր խաղա Պաղեստինի ապագա կառավարման գործում»։

Խոսելով Գազայում իրավիճակի մասին՝ նա ընդգծել է, որ «մարդասիրական տառապանքի մակարդակը անտանելի է»:

Հուլիսի 29-ին բրիտանական իշխանությունները նույնպես հայտարարել էին սեպտեմբերին Պաղեստինը ճանաչելու իրենց մտադրության մասին, եթե մինչ այդ պահը Իսրայելի իշխանությունները քայլեր չձեռնարկեն հակամարտությունը դադարեցնելու և Գազայի հատվածում մարդասիրական ճգնաժամը լուծելու համար։

Ավելի վաղ Ֆրանսիայի նախագահ Էմանուել Մակրոնը ևս հայտարարել էր, որ Փարիզը սեպտեմբերին ՄԱԿ-ի Գլխավոր ասամբլեայում կճանաչի Պաղեստին պետությունը։ Իտալիան հայտարարել էր Պաղեստինի պետությունը ճանաչելու իր պատրաստակամության մասին՝ դրա փաստացի ստեղծումից հետո։ Գերմանիայի կանցլեր Ֆրիդրիխ Մերցը Պաղեստինի ճանաչումը հնարավոր էր համարել միայն Գազայում հրադադարից հետո։