2 րոպեի ընթերցում
Շրջակա միջավայրի նախարարության և գործընկեր Կովկասի բնության հիմնադրամի համատեղ ջանքերով արդեն երրորդ տարին անընդմեջ Հայաստանում Ռենջերների միջազգային օրը նշվել է «Ռենջեր» մրցանակաբաշխությամբ՝ ի նշան գնահատանքի բնության պահապանների։ «Արմենպրես»-ի հաղորդմամբ՝ այս մասին «Ֆեյսբուք»-ի իր էջում տեղեկացրել է ՀՀ շրջակա միջավայրի նախարար Համբարձում Մաթևոսյանը։
«Գեղարքունիքի մարզպետ Կարեն Սարգսյանի, Էկոպարեկային ծառայության և նախարարության ներկայացուցիչների հետ մասնակցեցի մրցանակաբաշխությանը և հանդես եկա ողջույնի խոսքով։
Էկոպարեկային ծառայությունն այսօր պետության կողմից իրականացվող բնապահպանական քաղաքականության կարևոր օղակներից է։ Բնության պահապանները՝ էկոպարեկները, իրականացնում են ոչ միայն հսկողություն և վերահսկում, այլև կանխարգելիչ և կրթական գործառույթներ՝ ապահովելով շրջակա միջավայրի պահպանությանն ուղղված աշխատանքների շարունակականությունը։ Նրանց գործունեությունը հստակ օրինակ է ծառայողական բարեխղճության, նվիրումի և մասնագիտական պատասխանատվության»,- նշել է նախարարը։
Նրա տեղեկացմամբ՝ մրցանակաբաշխության արդյունքում մրցանակներ են հանձնվել բոլոր մասնակիցներին՝ որպես երախտագիտության և բարձր գնահատանքի արտահայտություն։ Մաթևոսյանն ուրախությամբ փաստել է, որ մրցանակային վեց տեղերից հինգը զբաղեցրել են Էկոպարեկային ծառայության ներկայացուցիչները։