367.38
Վրաստանի վարչապետը հույս է հայտնել, որ Երևանն ու Բաքուն մոտ ապագայում խաղաղության համաձայնագիր կստորագրեն
2 րոպեի ընթերցում
Վրաստանի վարչապետ Իրակլի Կոբախիձեն դրական է գնահատել Հայաստանի և Ադրբեջանի միջև խաղաղության համաձայնագրի ստորագրման շուրջ բանակցությունների ավարտը և հույս հայտնել, որ փաստաթուղթը մոտ ապագայում կստորագրվի։
«Արմենպրես»-ի փոխանցմամբ՝ Վրաստանի վարչապետն այդ մասին ասել է երկօրյա աշխատանքային այցով Թբիլիսիում գտնվող ՀՀ ներքին գործերի նախարար Արփինե Սարգսյանի հետ հանդիպման ժամանակ։
Հանդիպման վերաբերյալ ՆԳՆ-ի տարածած հաղորդագրության մեջ նշվում է, որ ընդգծվել է Հարավային Կովկասում կայուն խաղաղության բացառիկ կարևորությունը։
Իրակլի Կոբախիձեն վերահաստատել է Վրաստանի կառավարության պատրաստակամությունը՝ ապագայում ևս նպաստելու երկխոսությանը և տարածաշրջանում խաղաղության ու կայունության ապահովմանը։
Կողմերը կարևորել են նաև Հայաստանի և Վրաստանի բարեկամական ու բարիդրացիական հարաբերությունները, ինչպես նաև երկու հարևան պետությունների իրավապահ մարմինների սերտ ու արդյունավետ համագործակցությունը։
Հայաստանն ու Ադրբեջանն այս տարվա մարտի 13-ին հայտարարել են խաղաղության համաձայնագրի տեքստի նախագծի շուրջ համաձայնության գալու և բանակցություններն ավարտելու մասին։ Դրանից հետո Հայաստանն Ադրբեջանին առաջարկել է խորհրդակցություններ սկսել համաձայնագրի ստորագրման ժամկետներն ու վայրը որոշելու շուրջ, սակայն Ադրբեջանը նոր նախապայմաններ է առաջ քաշում և ձգձգում է գործընթացը։
Բաժանորդագրվեք մեր ալիքին Telegram-ում