Ներքին Գետաշենում ոռոգման ցանցի կառուցման խոշոր ծրագիր է իրականացվել

Գեղարքունիքի մարզի Մարտունի համայնքի Ներքին Գետաշեն գյուղում ՀՀ կառավարության կողմից 2024 թվականին իրականացվող սուբվենցիոն ծրագրերի շրջանակներում արդեն ավարտական փուլում են գտնվում ոռոգման ջրատարի ներքին ցանցի կառուցման աշխատանքները։

Ինչպես «Արմենպրես»-ին տեղեկացնում են Մարտունու համայնքապետարանից, Ներքին Գետաշենի ոռոգման ջրատարի ներքին ցանցի կառուցման ծրագրի պայմանագրային արժեքը կազմում է 290 միլիոն 450 հազար դրամ, որի 75 տոկոսը հատկացնում է ՀՀ կառավարությունը, 25 տոկոսը՝ Մարտունու համայնքապետարանը։ 

Ծրագրով նախատեսված է ոռոգման ջրատարի ներքին ցանցի կառուցում Ներքին Գետաշենի Դարեր, Ներքին Դեմեր, Սուրբ Խաչ, Վերին Դեմեր, Վերին Դուրան, Ներքին Դուրան, Գետափնյա թաղամասերի 12 փողոցներում՝ 5500 մետր ընդհանուր երկարությամբ, երկաթե կամ երկաթբետոնե կիսախողովակներով։ 

Շինարարական աշխատանքները, որոնք իրականացրել է «Բիդեք» ընկերությունը, մեկնարկել են 2024 թվականի օգոստոսի կեսերից և արդեն գտնվում են ավարտական փուլում։ 

Ոռոգման ներքին ցանցը միաժամանակ Ներքին Գետաշենում հիմնանորոգվող որոշ ճանապարհների համար ծառայելու է որպես ջրահեռացման համակարգ։ 

Ծրագրի իրականացման շնորհիվ այս  տարվանից շուրջ 400 տնտեսության ոռոգման ջուրը կմատակարարվի ժամանակին և անկորուստ։