Գեղարքունիքի մարզում մեկնարկում է ոռոգման շրջանը

Գեղարքունիքի մարզի Մարտունի համայնքի տնտեսություններում արդեն տրվել է ոռոգման շրջանի մեկնարկը։ 

Ինչպես «Արմենպրես»-ին տեղեկացրեց «Գեղարքունիք» ՋՕԸ տնօրեն Արտաշ Սարդարյանը, այժմ ոռոգման շրջանը մասամբ սկսված է նաև Վարդենիսում, իսկ առաջիկայում այն կմենկարկի նաև Գավառ համայնքի տնտեսություններում։ 

«Նախապատրաստական աշխատանքները «Գեղարքունիք» ՋՕԸ-ում գրեթե ամբողջությամբ ավարտված են։ Պատրաստի վիճակում են գտնվում բոլոր պոմպակայանները, խորքային հորերը, ջրամատակարարման ինքնահոս համակարգերը։ Ոռոգման շրջանի մեկնարկին զուգահեռ ակտիվորեն ընթանում են հայտերի հավաքագրման աշխատանքները։

«Ոռոգման համակարգերի արդիականացում» ծրագրի շրջանակներում շուրջ 70 տոկոսով իրականացված է «Մանասի առու» ոռոգման ինքնահոս ջրատարի հիմնանորոգումը, որի պայմանագրային արժեքը կազմում է 319,4 միլիոն դրամ։ Իսկ նույն ծրագրի շրջանակներում արդեն ավարտվել է Լանջաղբյուրի ջրամբարի մոտեցնող ջրանցքի կառուցումը պոլիէթիլենային փակ խողովակաշարով՝ 2650 մետր երկարությամբ, ինչի արդյունքում այն արդեն սնում է Լանջաղբյուրի ջրամբարը։

Առաջիկա օրերին Վարդենիս համայնքի Ծովակ գյուղում կշահագործվի արդի չափորոշիչների համապատասխան ոռոգման նոր համակարգ, որը կառուցվել է «ՄԱԶԾ-ԳԷՀ Փոքր դրամաշնորհների ծրագրի» շրջանակներում, Վարդենիսի համայնքապետարանի և «Գեղարքունիք» ՋՕԸ համագործակցությամբ, ինչի արդյունքում ոռոգելի կդառնա շուրջ 250 հեկտար հողատարածք։ Իսկ համայնքներում նախորդ տարում սուբվենցիոն ծրագրերով կառուցված ոռոգման համակարգերի շնորհիվ ջուրը տնտեսություններին կմատակարարվի ժամանակին ու անկորուստ։ Մեր կողմից արվում է հնարավորը, որպեսզի ոռոգման ջուրը մեր բաժանորդներին մատակարարվի ժամանակին ու անխափան։ Մատակակարված ոռոգման ջրի դիմաց նախորդ տարվա վարձավճարները գանձվել են 108 տոկոսով»,-նշեց Արտաշ Սարդարյանը։