1 րոպեի ընթերցում
«Երևան» պատանեկան սիմֆոնիկ նվագախմբի հենքի վրա կստեղծվի «Երևան երիտասարդական նվագախումբ» ՀՈԱԿ:
Ինչպես «Արմենպրես»-ին տեղեկացրին Երևանի քաղաքապետարանից, նախագծի նպատակը համայնքային մնայուն կառույցի հիմնումն է, որը կդառնա Երևանի մշակութային դեսպանը համաշխարհային բեմում:
«Նախագծի մանրամասներն ու զարգացման ծրագրերը Երևանի քաղաքապետ Տիգրան Ավինյանին է ներկայացրել Հայաստանի պետական սիմֆոնիկ նվագախմբի գեղարվեստական ղեկավար և գլխավոր դիրիժոր Սերգեյ Սմբատյանը:
Նախաձեռնությունը կդառնա կամուրջ կրթական համակարգի և պրոֆեսիոնալ երաժշտական աշխարհի միջև՝ ապահովելով հավասար հնարավորություններ բոլոր երիտասարդների համար։ Այն ոչ միայն կբացահայտի տաղանդավոր երաժիշտներին, այլև կլինի ոգեշնչող նախագիծ` դասական երաժշտությունը նախընտրող ծնողների ու նրանց երեխաների համար:
Նվագախումբը պարբերաբար հանդես կգա ինչպես Հայաստանում, այնպես էլ արտերկրում՝ ներկայացնելով հայ երաժշտական մշակույթը և Երևանի մշակութային դիմագիծը»,- ասվում է հաղորդագրության մեջ։