Փեզեշքիանն Ալիևին կոչ է արել հետաքննել Իրանի վրա հարձակվելու համար Իսրայելի կողմից Ադրբեջանի օդային տարածքն օգտագործելու մասին լուրերը
3 րոպեի ընթերցում
Իրանի Իսլամական Հանրապետության նախագահ Մասուդ Փեզեշքիանն Ադրբեջանի նախագահ Իլհամ Ալիևի հետ հեռախոսազրույցի ընթացքում վերջինիս կոչ է արել մանրակրկիտ հետաքննություն անցկացնել այն հաղորդագրությունների վերաբերյալ, որոնք ենթադրում են, որ իսրայելական անօդաչու սարքերը և միկրոօդանավերը կարող են Իրանի օդային տարածքը ներխուժած լինել Ադրբեջանի տարածքով։
«Արմենպրես»-ի հաղորդմամբ՝ այս մասին հայտնում է IRNA գործակալությունը՝ մանրամասներ ներկայացնելով նախագահների հեռախոսազրույցից։
Նշվում է, որ Փեզեշքիանն ընդգծել է, որ Իրանը երբեք պատերազմ չի սկսել և հավելել, որ Իսրայելը գործել է միջազգային իրավունքի խախտմամբ՝ հարձակվելով Իրանի վրա, այդ թվում՝ միջուկային օբյեկտները թիրախավորելով, ինչը «մարդկության դեմ հանցագործություն» է։
«Ընդգծելով քաղաքացիական բնակչության շրջանում զոհերի և ոչ ռազմական տարածքների ռմբակոծության մասին՝ Փեզեշքիանը քննադատել է Միավորված ազգերի կազմակերպությանն Իսրայելի ռեժիմի հարվածները չդատապարտելու համար։ Նա նշել է, որ հարձակումը տեղի է ունեցել դիվանագիտական բանակցությունների ընթացքում՝ նշելով, որ չնայած ամերիկացի բանակցողները պնդում էին, որ Իսրայելը չի գործի առանց ԱՄՆ-ի հաստատման, հարձակումը տեղի է ունեցել բանակցությունների վեցերորդ փուլից անմիջապես առաջ՝ դադարեցնելով բանակցային գործընթացը»,- ասված է լրատվականի հաղորդագրության մեջ։
Նշվում է, որ Իրանի նախագահը վերահաստատել է Թեհրանի հանձնառությունը խաղաղ և հարգալից տարածաշրջանային հարաբերությունների՝ ընդգծելով, որ Իրանը ձգտում է կայունության և հարգում է իր բոլոր հարևանների տարածքային ամբողջականությունը։
Ի պատասխան՝ Ադրբեջանի նախագահ Իլհամ Ալիևն ափսոսանք է հայտնել Իսրայելի հարձակումների և դրա հետևանքով քաղաքացիական բնակչության շրջանում զոհերի համար և ողջունել է հրադադարն ու վերահաստատել Ադրբեջանի հարգանքը՝ Իրանի ինքնիշխանության և տարածքային ամբողջականության նկատմամբ։
«Ադրբեջանը թույլ չի տվել, որ իր օդային տարածքը օգտագործվի Իրանի դեմ»,- իրանական լրատվամիջոցի փոխանցմամբ՝ ասել է Ալիևը։
Աղբյուրի փոխանցմամբ՝ Ալիևը հերքել է այն հաղորդագրությունները, որոնց համաձայն՝ Ադրբեջանի օդային տարածքը օգտագործվել է իսրայելական անօդաչու թռչող սարքերի կողմից Իրանի վրա հարձակվելու համար՝ շեշտելով, որ իր կառավարությունը պահպանում է իր օդային տարածքի նկատմամբ լիակատար վերահսկողությունը և երբեք թույլ չի տա, որ այն օգտագործվի Իրանի դեմ։
Ալիևը ցանկություն է հայտնել ընդլայնել կապերը Իրանի հետ տնտեսական, քաղաքական և անվտանգության ոլորտներում, և առաջարկել է իրանական պատվիրակություն ուղարկել Բաքու՝ Հյուսիս-Հարավ միջանցքի նախագծի վերաբերյալ առաջիկա եռակողմ բանակցությունների համար։
Ադրբեջանի նախագահը նաև հրավիրել է իր իրանցի գործընկերոջը մասնակցել Ադրբեջանում կայանալիք Տնտեսական համագործակցության կազմակերպության (ՏՀԿ) գագաթնաժողովին։