2 րոպեի ընթերցում
Ժողովրդական երաժշտության և պարի ազգային կենտրոնի Հայաստանի ազգային նվագարանների պետական նվագախումբը համագործակցել է Spitfire Audio միջազգային ճանաչում ունեցող բրիտանական ընկերության հետ` մասնակցելով բացառիկ ձայնագրման նախագծի։
Spitfire Audio-ն աշխարհահռչակ ընկերություն է, որը ստեղծում է բարձրորակ վիրտուալ երաժշտական գործիքներ և նվագախմբային սեմփլների գրադարաններ, որոնք լայնորեն կիրառվում են ֆիլմերի, հեռուստաշոուների, վիդեոխաղերի և ժամանակակից երաժշտական ստեղծագործությունների մեջ։
Նրանց հնչյունային գրադարաններից օգտվում են համաշխարհային ճանաչում ունեցող կոմպոզիտորներ, ինչպիսիք են Հանս Ցիմերը, Օլաֆուր Արնալդսը, Բրայան Էնոն և այլոք։
Հայկական ազգային նվագարանների` դուդուկի, քանոնի, քամանչայի, թառի, շվիի և այլ գործիքների յուրահատուկ հնչողությունը ձայնագրվել է միջազգային ստանդարտներին համապատասխան և շուտով հասանելի կլինի հազարավոր երաժիշտների ամբողջ աշխարհում։
Այս համագործակցությունը կարևոր քայլ է հայկական երաժշտական մշակույթը համաշխարհային հարթակներում ներկայացնելու, ժամանակակից տեխնոլոգիաների միջոցով ազգային հնչյունային ժառանգությունը պահպանելու և տարածելու, նոր սերնդի կոմպոզիտորների և ստեղծագործողների համար ոգեշնչման աղբյուր դառնալու համար:
Ձայնագրությունները իրականացվել են բարձրակարգ տեխնիկայով՝ միջազգային մասնագետների մասնակցությամբ։
Այս նախաձեռնությունը ոչ միայն մեծ ճանաչում կբերի հայկական երաժշտությանը, այլ նաև կապեր կստեղծի համաշխարհային մշակութային համայնքի հետ։
Ձայնագրությունը իրականացվել է երգիչ և երաժիշտ Դանիել Դեքերի միջնորդությամբ և նրա հետ համագործակցությամբ։