2 րոպեի ընթերցում
Թեհրանին և Սպահանին հասցրած հարվածներից հետո Իսրայելը կրկին թիրախավորել է Իրանում գտնվող օբյեկտներ։ Իրանի հակաօդային պաշտպանության համակարգերը դիմակայում են հարձակմանը։ «Արմենպրես»-ի փոխանցմամբ՝ այս մասին հաղորդում է Mehr լրատվական գործակալությունը։
Նշվում է, որ Իրանի հարավ-արևմտյան Խուզեստանի նահանգի Ահվազ քաղաքում երեք պայթյուն է լսվել։
The Associated Press գործակալությունը հաղորդում է, որ հարվածներ են հասցվել նաև Իրանի արևմուտքում գտնվող Քերմանշահ քաղաքին, որի բնակիչները հայտնել են պայթյունների և քաղաքի վրա բարձրացող սև ծխի մասին։
Պայթյուններ են լսվել նաև Թավրիզ քաղաքում։
Թեհրանում ևս նոր պայթյուններ են լսվել, սակայն պարզ չէ՝ արդյոք դա եղել է նոր հարձակում, թե ՀՕՊ համակարգերի աշխատանքը։
Իսրայելի վարչապետ Բենիամին Նեթանյահուն ավելի վաղ հայտարարել էր, որ թիրախավորվել են Նաթանզում գտնվող ուրանի հարստացման գլխավոր օբյեկտը և Իրանի բալիստիկ հրթիռների ծրագիրը, ինչպես նաև միջուկային ոլորտի առաջատար գիտնականները և պաշտոնյաները։ Նաթանզի միջուկային օբյեկտի վրա հարձակումը հաստատել է նաև Ատոմային էներգիայի միջազգային գործակալությունը։
Սպանվել են նաև իրանցի գիտնականներ և հրամանատարներ, այդ թվում՝ Իսլամական հեղափոխության պահապանների կորպուսի գլխավոր հրամանատար, գեներալ-մայոր Հոսեյն Սալամին։
Իրանի գերագույն առաջնորդ Այաթոլլա Ալի Խամենեին կոշտ պատասխան է խոստացել այս հարձակումներին։