1 րոպեի ընթերցում
Փարիզի դատարանը մայիսի 13-ին ֆրանսիացի կինոաստղ Ժերար Դեպարդյեին մեղավոր է ճանաչել 2021 թվականին «Կանաչ փեղկեր» ֆիլմի նկարահանման հրապարակում երկու կանանց նկատմամբ սեռական ոտնձգությունների մեջ և նրան դատապարտել 18 ամսվա պայմանական ազատազրկման։ «Արմենպրես»-ի փոխանցմամբ՝ այս մասին հաղորդում է France24 պարբերականը։
Փարիզի դատարանը նաև կարգադրել է, որ 76-ամյա Դեպարդյեն, որը ներկա չէր դատավճռին, գրանցվի սեռական հանցագործների գրանցամատյանում։
Դեպարդյեն, որը նկարահանվել է ավելի քան 200 ֆիլմերում և հեռուստասերիալներում, ավելի վաղ հերքել էր իր հանդեպ ներկայացված մեղադրանքները։ Նրա փաստաբանը հայտնել է, որ դերասանը կբողոքարկի վճիռը։
Դերասանին ոտնձգությունների կամ ոչ պատշաճ պահվածքի մեջ մեղադրել է շուրջ 20 կին, սակայն սա առաջին դեպքն է, որ գործը հասել է դատարան։ Հայցվորներն են 54-ամյա բեմանկարիչը և 34-ամյա ռեժիսորի օգնականը, որոնք դերասանին մեղադրել են սեռական ոտնձգությունների մեջ:
Դեպարդյեն ավելի վաղ դատական լսումների ժամանակ խոստովանել էր, որ կոպիտ է, վատ բառապաշար է օգտագործում, բայց ոչ ոքի «ձեռք չի տվել»։