Հայաստանի պատմության թանգարանը մի շարք միջոցառումներով կմեկնարկի «Թանգարանների գիշեր»-ը

«Թանգարանների ապագան արագ փոփոխվող համայնքներում» խորագիրը կրող թանգարանների միջազգային օրվա և «Թանգարանների գիշեր» միջոցառումների շրջանակներում Հայաստանի պատմության թանգարանը կազմակերպում է մի շարք միջոցառումներ: 

Ինչպես «Արմենպրես»-ը տեղեկանում է Պատմության թանգարանի տարածած հաղորդագրությունից, մայիսի 17-ին ժամը 20։00-ին Հայաստանի պատմության թանգարանում համերգային ծրագրով հանդես կգա «Կայթ» նվագախումբը։ Երեկոյի ընթացքում կհնչեն պատմական Հայաստանի տարբեր գավառներից պահպանված երգեր՝ նոր մշակումներով, այդ թվում՝ «Գորանի», «Հավկունք վըր ծովունը», «Թագպարը» և այլն:

Մայիսի 17-ին ժամը 21։00-ին Հայաստանի պատմության թանգարանում կվերաբացվի  «Պետականության վերականգնման ուղիներով. 15–18-րդ դարեր» խորագրով մշտական ցուցադրությունը։ Ցուցադրությունում տեղ են գտել մշակութային ժառանգությունը փաստող եկեղեցական արձանագիր նվիրաբերություններ և փաստաթղթեր, սփյուռքահայ համայնքներից մեզ հասած տպագիր գրքեր, Ղուկաս Վանանդեցու պատրաստած աստրոլաբը, Սանահինի դաջազարդ հիասքանչ վարագույրը, Երևանի քանդված Պողոս Պետրոս եկեղեցու վերականգնված որմնանկարները, Սիմեոն Երևանցի կաթողիկոսի գահը և մի շարք այլ արժեքավոր նմուշներ։

Մայիսի 17-ին և 18-ին ժամը 11:00-ից թանգարանում կանցկացվեն տարբեր բարբառներով շրջայցներ՝ «Մեր պատմությունը՝ մեր բարբառներով» խորագրի ներքո։