Հնդկաստանի վարչապետ Նարենդրա Մոդին չեղարկել է Եվրոպա կատարելիք այցը

Հնդկաստանի վարչապետ Նարենդրա Մոդին չեղարկել է Եվրոպա կատարելիք իր նշանակալի շրջագայությունը: «Արմենպրես»-ի փոխանցմամբ՝ այս մասին հայտնում է հնդկական անգլալեզու 18news հեռուստաալիքը։ 

Մայիսի կեսերին նախատեսված շրջագայությունը ներառում էր այց Խորվաթիա, Նորվեգիա և Նիդեռլանդներ։

Չնայած չեղարկման պաշտոնական պատճառները հստակորեն չեն նշվել, որոշումը կայացվել է Հնդկաստանի ռազմական գործողություններից հետո տարածաշրջանային լարվածության աճի ֆոնին:

Այս զարգացումը ենթադրում է դիվանագիտական ​​առաջնահերթությունների հնարավոր վերագնահատում՝ հաշվի առնելով փոփոխվող անվտանգության միջավայրը, քանի որ վարչապետի ուշադրությունը, հավանաբար, կսևեռվի ներքին և տարածաշրջանային հարցերի վրա՝ Պակիստանում իրականացված գործողությունից հետո։

Ավելի վաղ վարչապետ Մոդին չեղարկել էր իր այցը Ռուսաստան, որի ընթացքում նախատեսվում էր նրա մասնակցությունը Մոսկվայում մայիսի 9-ին Հաղթանակի օրվա տոնակատարություններին։

Ըստ վերջին տեղեկություների՝ Պակիստանում Հնդկաստանի հարվածներից զոհվել է 26 մարդ, վիրավորվել՝ 46-ը, իսկ Հնդկաստանում Պակիստանի պատասխան հարվածներից զոհվել է 10 մարդ, վիրավորվել՝ 48-ը։ 

«Սինդուր գործողությունը», ինչպես Հնդկաստանն անվանում է Պակիստանի վրա հարվածները, երկրի պատասխանն է ապրիլի 22-ին Պահալգամում 26 մարդու կյանք խլած ահաբեկչական հարձակմանը, որի մեջ Նյու Դելին մեղադրում է Իսլամաբադին։