2 րոպեի ընթերցում
ՀՀ կառավարությունն ապրիլի 23-ի նիստում ընդունեց որոշման նախագիծ, որով Սիրիայի սոցիալ-տնտեսական ծանր վիճակում հայտնված բնակչությանը կտրամադրվի մարդասիրական օգնություն։
«Արմենպրես»-ի հաղորդմամբ՝ նախագծի համաձայն՝ կառավարությունը կտրամադրի 49 մլն դրամ՝ օգնության միջոցառումները կազմակերպելու նպատակով։
Որոշման նախագծի հիմնավորման մեջ նշվում է, որ աջակցության կարիքը պայմանավորված է Սիրիայում ընթացող իրադարձություններով, որոնք մեծ թվով մարդկանց զրկել են կենսական անհրաժեշտ միջոցներից։ Հայկական կողմից ցուցաբերվող օգնությունը ներառելու է առաջին անհրաժեշտության մթերք և դեղորայք՝ ուղղված սոցիալ-տնտեսական առաջնային կարիքների ապահովմանը։
Մասնավորապես, նախատեսվում է հետևյալ վերաբաշխումը՝ 25,9 մլն դրամ՝ առողջապահական և լաբորատոր նյութերի ձեռքբերման համար, 23,1 մլն դրամ՝ կենցաղային և հանրային սննդի նյութերի մատակարարման համար։
Ըստ նախագծի՝ օգնությունն ուղղվելու է մարդու հիմնարար իրավունքների պաշտպանությանը՝ կյանքի և առողջության անվտանգության ապահովման միջոցով։
Որոշումն իրականացվելու է ՀՀ պետական բյուջեի վերաբաշխման միջոցով, առանց լրացուցիչ իրավական ակտերի ընդունման անհրաժեշտության։
Հայաստանը Սիրիային ևս մեկ մարդասիրական օգնություն տրամադրելու մասին հայտարարել էր այս տարվա մարտի 20-ին։ Այդ ժամանակ 10 օրով բացվել էր հայ-թուրքական սահմանը՝ հումանիտար բեռը Թուրքիայի տարածքով Սիրիա հասցնելու համար։