Սլովենիայի ԱԳ նախարարը հույս ունի, որ Հայաստանի ու Ադրբեջանի միջև խաղաղության համաձայնագրի ստորագրումը շատ չի ուշանա
2 րոպեի ընթերցում
Սլովենիայի արտաքին գործերի նախարար Տանյա Ֆայոնը հայտարարել է, որ Լյուբլյանան մեծապես գնահատում է խաղաղությանն ուղղված Հայաստանի ջանքերը՝ հույս հայտնելով, որ խաղաղության շուրջ Երևանի ու Բաքվի միջև համաձայնագրի ստորագրումը շատ չի ուշանա։
«Արմենպրես»-ի հաղորդմամբ՝ այս մասին Սլովենիայի արտաքին գործերի նախարար Տանյա Ֆայոնը հայտարարել է Հայաստանի ԱԳ նախարար Արարատ Միրզոյանի հետ համատեղ ասուլիսի ընթացքում՝ անդրադարձ կատարելով Հայաստանի և Ադրբեջանի միջև խաղաղության համաձայնագրի շուրջ ընթացող գործընթացներին։
«Մենք մեծապես գնահատում ենք խաղաղությանն ուղղված Հայաստանի ջանքերը, խաղաղության օրակարգը։ Շատ ուրախ եմ, որ այսօր այս տարածաշրջանում այնպիսի մի իրավիճակ է, երբ Հայաստանը և Ադրբեջանը մի կարևորագույն քայլի առաջ են կանգնել՝ կանոնակարգելու երկկողմ հարաբերությունները։ Ես գնահատում եմ այն մեծ աշխատանքը, որ Հայաստանը կատարում է այս խաղաղության նախաձեռնությունում, քանի որ խաղաղությունը օգտակար է տարածաշրջանում յուրաքանչյուր կողմի համար։ Մենք քաջալերում և ողջունում ենք խաղաղության համաձայնագրի նախագծի տեքստի ամփոփումը։ Հուսանք, որ ստորագրումը շուտով կլինի, և լարվածությունը կնվազի այս տարածաշրջանում»,-նշել է Սլովենիայի ԱԳ նախարարը։
Նա հավելել է, որ Երևանի ու Բաքվի միջև խաղաղության հաստատումը ընդհանուր տարածաշրջանի համար դրական զարգացումների կհանգեցնի։