2 րոպեի ընթերցում
Երևանի քաղաքապետ Տիգրան Ավինյանը հերքել է մամուլում պարբերաբար շրջանառվող լուրերը, թե ԱՆԻՖ-ում (Հայաստանի պետական հետաքրքրությունների ֆոնդ) ենթադրյալ չարաշահումների վերաբերյալ քրեական գործի շրջանակներում նաև իրեն առնչվող իրավական գործընթացներ կան։
«Արմենպրես»-ի փոխանցմամբ՝ Տիգրան Ավինյանը թեմային անդրադարձել է լրագրողների հետ զրույցում։
«Եթե մենք մամուլի նմանատիպ հոդվածների վրա մեր գործողությունները կառուցենք, կարծում եմ, որ շատ սխալ տեղում կլինենք։ Իմ հետ կապված նմանատիպ իրավական գործընթաց չկա և չի կարող լինել»,- ասել է Ավինյանը։
Հարցին, թե ինչպիսի հարաբերություններ ունի վարչապետ Նիկոլ Փաշինյանի հետ՝ Ավինյանը պատասխանել է. «Մտերիմ»։
2025 թվականի ապրիլին ՀՀ գլխավոր դատախազությունը հայտնել էր, որ «Հայաստանի պետական հետաքրքրությունների ֆոնդում»՝ ԱՆԻՖ-ում ենթադրյալ չարաշահումների վերաբերյալ կա հարուցված քրեական գործ, որի նախաքննությունն ընթանում է ՀՀ քննչական կոմիտեի հատուկ հանձնարարություններով գործերի քննության վարչությունում։ Նշվում է, որ քրեական վարույթը հարուցվել է Պետական վերահսկողական ծառայության կատարած ուսումնասիրությունից հետո:
ԱՆԻՖ-ը հիմնադրվել էր 2019 թվականին, իսկ 2024 թվականի մայիսին ՀՀ կառավարության որոշմամբ այն լուծարվեց։ Տիգրան Ավինյանը հիմնադրման պահից մինչև 2023 թվականի հոկտեմբեր ԱՆԻՖ-ի տնօրենների խորհրդի նախագահն էր։