Խուզարկություններ և ձերբակալություններ Ստեփանավանում. Հակակոռուպցիոն կոմիտեն հայտնում է 14 անձի ձերբակալության մասին

Հայաստանի հակակոռուպցիոն կոմիտեում քրեական վարույթի շրջանակներում խուզարկություններ ու վարութային այլ գործողություններ են իրականացվում Լոռու մարզի Ստեփանավան համայնքում։

«Արմենպրես»-ին այս մասին հայտնեցին ՀՀ հակակոռուպցիոն կոմիտեից՝ նշելով, որ ձերբակալվել է 14 անձ։

«Անհրաժեշտության դեպքում կտրվի լրացուցիչ տեղեկատվություն»,- նշեցին Հակակոռուպցիոն կոմիտեից:

Ավելի վաղ «Ուժեղ Հայաստան» խմբակցության պատգամավոր Անդրանիկ Գևորգյանը հայտնել էր Ստեփանավանի տարածաշրջանում «Ուժեղ Հայաստան» կուսակցության աջակիցների շրջանում համատարած խուզարկությունների ու ձերբակալությունների մասին։

Հիշեցնենք, որ Ստեփանավան համայնքում հոկտեմբերի 25-ին անցկացվելու են տեղական ինքնակառավարման մարմինների ընտրություններ։ Ստեփանավան համայնքում ՏԻՄ ընտրություններին մասնակցելու համար գրանցվել է 4 քաղաքական ուժ՝ «Գործարար» կուսակցությունը, որի ցուցակը գլխավորում է Արմեն Գրիգորյանը, «Հանրապետություն» կուսակցությունը, որի ցուցակի առաջին համարն Արտակ Ալեքսանյանն է, «Քաղաքացիական պայմանագիր» կուսակցությունը, որի ցուցակը գլխավորում է Արայիկ Ներսիսյանը և «Ուժեղ Հայաստան» կուսակցությունը, որի ցուցակի առաջին համարն Արսեն Գևորգյանն է։