Ուկրաինան և Ռուսաստանը նոր հարվածներ են փոխանակել. կան զոհեր և վիրավորներ

Ուկրաինան և Ռուսաստանը հայտարարել են միմյանց նոր հարվածներ հասցնելու մասին։ Ուկրաինական կողմում կա 4 զոհ, Ռուսաստանում՝ 1: Հարվածների հետևանքով կան նաև վիրավորներ։

«Արմենպրես»-ի փոխանցմամբ՝ BBC-ի ռուսական ծառայությունը հաղորդում է, որ ռուսական ուժերը հարվածային անօդաչու թռչող սարքերով հերթական անգամ գրոհել են Խարկովը։ Ըստ քաղաքապետ Իգոր Տերեխովի՝ փլուզված շենքի փլատակներից փրկարարները դուրս են բերել չորրորդ զոհի մարմինը։ Եվս 35 մարդ վիրավորվել է։ Փլատակներում կարող են էլի մարդիկ լինել։ 

Տեղական իշխանությունները հաղորդել են, որ Խարկովին ԱԹՍ-ների վեց հարված է հասցվել, կան մեծ ավերածություններ, վնասվել է 30 բազմահարկ շենք։

Զապորոժիեի մարզում ռուսական ԱԹՍ-ների հարվածից 1 մարդ վիրավորվել է։ Կիևի մարզում նույնպես 1 մարդ է վիրավորվել, մի քանի մեքենաներ՝ այրվել։ Իսկ Դնեպրում 3 մարդ է վիրավորվել ռուսական հարվածներից, բռնկվել են հրդեհներ, վնասվել են վարչական շենքեր։

Իր հերթին, Ռուսաստանի պաշտպանության նախարարությունը հաղորդում է, որ հակաօդային պաշտպանության համակարգերը ապրիլի 3-ի գիշերը և ապրիլի 4-ի առավոտյան խոցել են ուկրաինական 107 ինքնաթիռային տիպի ԱԹՍ Կուրսկի, Օռլովի, Լիպեցկի, Կալուգայի, Ռոստովի, Մոսկվայի, Բրյանսկի մարզերում և մի շարք այլ տարածաշրջաններում։

Բրյանսկի իշխանությունները հայտնել են, որ ուկրաինական ԱԹՍ-ների հարվածների հետևանքով բեկորային վնասվածքներից զոհվել է 1  բնակիչ, 1 մարդ վիրավորվել է։

Մոսկվայի քաղաքապետ Սերգեյ Սոբյանինը հայտնել է, որ ՀՕՊ համակարգերը հետ են մղել ԱԹՍ-ի հարձակումը ՌԴ մայրաքաղաքի վրա։ Բեկորների ընկնելու վայրում աշխատում են արտակարգ ծառայությունների մասնագետները։

Ավելի վաղ «Ռոսավիացիա»-ն հայտնել էր, որ Մոսկվայի երեք օդանավակայաններում՝ «Վնուկովո», «Դոմոդեդովո» և «Ժուկովսկի», թռիչքների ժամանակավոր սահմանափակումներ են մտցվել։