Երևանում սանիտարական մաքրման աշխատանքներն իրականացնելու համար քաղաքապետարանը ձեռք է բերել 12 բազմաֆունկցիոնալ մեքենա
2 րոպեի ընթերցում
Երևանի քաղաքապետարանը ձեռք է բերել 12 նոր բազմաֆունկցիոնալ մեքենա՝ քաղաքում սանիտարական մաքրման աշխատանքներ իրականացնելու համար:
«Արմենպրես»-ի հաղորդմամբ՝ Երևանի քաղաքապետ Տիգրան Ավինյանն անձամբ ներկա էր «Կերխեր» (Karcher) ընկերության հատուկ տեխնիկայի ներկայացմանն ու գործարկմանը:
Ավինյանը նշեց՝ Երևանի քաղաքապետարանի կողմից ձեռք բերված բազմաֆունկցիոնալ մեքենաները նախատեսված են փողոցների, մայթերի սանիտարական մաքրման աշխատանքների համար, իսկ ձմռան ամիսներին՝ ձյան մաքրման, աղ և ավազով մշակման համար:
«Այս բազմաֆունկցիոնալ մեքենաները մեզ էականորեն կօգնեն աղբահանության գործում, ձմեռային շրջանում՝ ձնամաքրման աշխատանքներում, քանի որ դրանք մաքրում, փոշեկուլում, լվանում և մի շարք այլ աշխատանքներ են իրականացնում: Կարծում եմ, որ Երևան քաղաքին նմանատիպ տեխնիկան շատ անհրաժեշտ է, և մեր պարկը շարունակաբար պետք է համալրենք նմանատիպ տեխնիկայով»,- նշեց Ավինյանը:
Քաղաքապետը հավելեց, որ հատկապես քաղաքի էականորեն կարևոր հատվածներում, որտեղ շատ մեծ քանակի մարդկանց շարժ կա, նմանատիպ տեխնիկան հնարավոր է օգտագործել: «Այս մեքենաներն արդյունավետ են նաև նրանով, որ ծանր չեն և վնասներ չեն հասցնի այն հատվածներում, որտեղ քարե սալապատում ունենք»,-ասաց նա:
Ավինյանը նշեց՝ այս ամբողջ պարկի տեխնիկան ձեռք բերելու համար ծախսվել է 609 միլիոն դրամ:
