391.07
Գերմանիայի նախագահը ԵՄ-ին անդամակցության գործընթաց սկսելու Հայաստանի որոշումը համարձակ քայլ է համարում
3 րոպեի ընթերցում
Գերմանիայի նախագահ Ֆրանկ-Վալտեր Շտայնմայերը Եվրոպական միությանն անդամակցելու գործընթացի մեկնարկի մասին Հայաստանի խորհրդարանի կողմից ընդունված որոշումը համարձակ քայլ է համարում՝ ընդգծելով, որ Բեռլինը հարգանքով է վերաբերվում Երևանի նման որոշմանը։
«Արմենպրես»-ի հաղորդմամբ՝ այս մասին Գերմանիայի նախագահը հայտարարել է Հայաստանի նախագահ Վահագն Խաչատուրյանի հետ համատեղ մամուլի ասուլիսի ժամանակ՝ խոսելով Հայաստան-Եվրոպական միություն հարաբերությունների խորացման, ինչպես նաև Բրյուսելի հետ Երևանի երկխոսության հեռանկարների և հետագա քայլերի մասին հարցի շուրջ։
Գերմանիայի նախագահն ընդգծել է, որ Բեռլինը հարգանքով է վերաբերվում Եվրոպական միությանն անդամակցության մեկնարկի մասին Հայաստանի խորհրդարանի ընդունած որոշմանը։
«Մենք հարգանքով ենք վերաբերվում այդ որոշմանը։ Դա համարձակ քայլ է։ Այստեղ բարեփոխումներին ուղղված շատ մեծ աշխատանք կա կատարելու, և մենք խոսել ենք նաև բարեփոխումների անհրաժեշտության մասին։ Ես այնպիսի տպավորություն ունեմ, որ Հայաստանում կա այն իրատեսական պատկերացումը, որ դեպի Եվրամիություն ճանապարհը երկար է»,-նշել է Ֆրանկ-Վալտեր Շտայնմայերը։
Անդրադառնալով այդ հարցում Գերմանիայի աջակցությանը՝ Շտայնմայերը նշել է, որ Հայաստանն ու ԵՄ-ն բանակցություններ են վարում օրակարգային նոր փաստաթղթի ստորագրման շուրջ, ինչպես նաև հիշեցրել է, որ ԵՄ-ի արտաքին գործերի և անվտանգության քաղաքականության հարցերով բարձր ներկայացուցիչ Կայա Կալասը մոտ ապագայում ժամանելու է Հայաստան՝ այդ բոլոր հարցերի շուրջ բանակցություններ անցկացնելու նպատակով։
Գերմանիայի նախագահը հայտարարել է, որ Հայաստան-ԵՄ հարաբերություններին պետք չէ թերահավատորեն մոտենալ, իսկ դրանց զարգացումը կօգնի Հայաստանի տնտեսության զարգացմանը։
Հայաստանի Ազգային ժողովը մարտի 26-ին երկրորդ ընթերցմամբ և ամբողջությամբ ընդունել է «Եվրոպական միությանը Հայաստանի Հանրապետության անդամակցելու գործընթացի մեկնարկի մասին» օրենքի նախագիծը։
Նախագծի փոփոխված վերջնական ձևակերպմամբ սահմանվում է. «Հայաստանի Հանրապետությունը, նպատակ ունենալով զարգացնել ժողովրդավարական ինստիտուտները, բարձրացնել հասարակության բարեկեցությունը, ամրապնդել երկրի անվտանգությունը, դիմակայունությունը և իրավունքի գերակայությունը, հայտարարում է Եվրոպական միությանը Հայաստանի Հանրապետության անդամակցելու գործընթացի մեկնարկը»։
Բաժանորդագրվեք մեր ալիքին Telegram-ում