ՀՀ ԱԳ փոխնախարարն անդրադարձել է սահմանին հրադադարի խախտումների վերաբերյալ Ադրբեջանի ապատեղեկատվություններին

Հայաստանի Հանրապետության արտաքին գործերի նախարարի տեղակալ Վահան Կոստանյանի դիտարկմամբ՝ հայ-ադրբեջանական սահմանային գոտում Հայաստանի զինված ուժերի կողմից հրադադարի խախտումների մասին Ադրբեջանից հնչող ապատեղեկատվությունները որևէ դրական ազդեցություն չեն ունենում երկու երկրների միջև հարաբերությունների կարգավորման մթնոլորտի վրա։ 

«Արմենպրես»-ի հաղորդմամբ՝ այս մասին Վահան Կոստանյանը հայտարարել է կառավարության նիստից հետո լրագրողների հետ ճեպազրույցի ընթացքում։

«Հստակորեն կարող եմ արձանագրել, որ այդ կեղծ հայտարարությունները որևէ կերպ դրականորեն չեն ազդում մթնոլորտի վրա։ Այնուամենայնիվ, մենք հայտարարել ենք, որ պատրաստ ենք բանակցություններ սկսել համաձայնագրի ստորագրման տեղի և ժամկետների վերաբերյալ և այս պահին սպասում ենք ադրբեջանական կողմի արձագանքին»,-նշել է Կոստանյանը։  

Անդրադառնալով հարցին, թե լինելո՞ւ է արդյոք որևէ երրորդ երկրի մասնակցություն այդ համաձայնագրի ստորագրմանը՝ Վահան Կոստանյանը հիշեցրեց, որ կարգավորման գործընթացն արդեն տևական ժամանակ է՝ իրականացվում է երկկողմ բանակցությունների հիման վրա։

«Գիտեք, որ քննարկումները և բանակցություններն, ըստ էության, երկկողմ են ընթացել, այս պահին այլ մանրամասներ չկան։ Բնականաբար, երբ լինել այս առումով նորություններ, արտաքին գործերի նախարարությունը և կառավարությունը պատեհ պահին կտեղեկացնեն հանրությանը»,-շեշտել է Կոստանյանը։ 

Հայաստանն ու Ադրբեջանը մարտի 13-ին հայտարարել են խաղաղության համաձայնագրի նախագիծը համաձայնեցնելու և դրա շուրջ բանակցություններն ավարտելու ուղղությամբ։ Հայաստանի վարչապետ Նիկոլ Փաշինյանն Ադրբեջանի նախագահ Իլհամ Ալիևին առաջարկել է խորհրդակցություններ սկսել համաձայնագրի ստորագրման ժամկետների և վայրի վերաբերյալ, Ադրբեջանը, մինչդեռ, նախապայմաններ է առաջ քաշում համաձայնագիրը ստորագրելու համար։ Մասնավորապես, ադրբեջանական կողմը շարունակում է պնդել կեղծ թեզը, թե Հայաստանի Սահմանադրությունը իբր տարածքային պահանջներ է պարունակում Ադրբեջանի նկատմամբ՝ որպես խաղաղության համաձայնագիրը ստորագրելու նախապայման դնելով ՀՀ Սահմանադրության փոփոխության հարցը։ Ադրբեջանի երկրորդ նախապայմանը ԵԱՀԿ Մինսկի խմբի լուծարումն է։ Նախապայմաններին զուգահեռ Ադրբեջանը մի քանի օր շարունակում կեղծ լուրեր էր տարածում, թե Հայաստանի զինված ուժերը սահմանի տարբեր հատվածներում իբր կրակում են ադրբեջանական դիրքերի ուղղությամբ։